नारायणहितिया रेष्टुरेन्ट थुनेगु शुरु

येँ – नारायणहिति दरबार दुने दयेकाच्वंगु रेष्टुरेन्टया छेँ थुनेगु ज्या न्ह्याःगु दु । नारायणहिति संग्रहालय दुने बतास समूहं दयेकाच्वंगु भौतिक संरचना थुनेगु नितिं संस्कृति, पर्यटन तथा नागरिक उड्डयन मन्त्री प्रेम आलें स्वन्हुया ई बिउगु खःसा म्हिगःनिसें थुनेगु ज्या न्ह्याकूगु खः ।

मन्त्री आलें स्वन्हुया दुने संग्रहालयया संरचना मथुन धाःसा थम्हं आइतवाः न्हिनय् १२ बजे दुने थुनेगु ख्याच्वः बियादीगु खः । मन्त्री आलें संग्रहालय दुने रेष्टुरेन्ट दयेके बीगु निर्णय गलत जूगु धासें उकियात कयाः छानविन यायेत समिति नीस्वनादीगु खः ।

थ्वहे झ्वलय् संस्कृति, पर्यटन तथा नागरिक उड्डयनमन्त्री आलें पशुपति धर्मशाला बतास समूहयात बिउगु खँयात कयाः नं छानविन यायेत समिति नीस्वनादीगु दु । वय्कलं पशुपति क्षेत्र विकास कोषया कोषाध्यक्ष नारायणप्रसाद सुवेदीया संयोजकत्वय् छानविन समिति नीस्वंगु खः । न्याम्ह दुजः दुगु उगु समितिया दुजलय् परिषद्या दुजः आशा पाण्डे, विश्वकरण जयन व देवीप्रसाद बराल च्वनादीगु दुसा मन्त्रालयया लेखा उपसचिव सदस्य सचिव कथं च्वंगु दु । उगु समितियात नं न्हय्न्हुया दुने प्रतिवेदन लःल्हायेत निर्देशन बिउगु दु ।

भारतं दयेका बिउगु उगु धर्मशाला– यात होटेलया रुपय् सञ्चालन यानाच्वंगु खँ सार्वजनिक जुइवं उकियात कयाः छानविन यायेत मन्त्री आलें निर्देशन बियादीगु खः । थ्वहे झ्वलय् सीदु कथं होटेल हायातयात कयाः नं मन्त्री आलें छानविन यायेगु तयारी यानाच्वंगु दु ।

सम्बन्धित बुखँ

LEAVE YOUR COMMENTS