किपुलिइ विद्युतीय तार भूमिगत

किपू- शहरी सौन्दर्यताय् हाथ्या जुयाच्वंगु विद्युतीय तारत भूमिगत यायेगु ज्या थन नं शुरु जूगु दु । थनया शहरी लागाय् अव्यवस्थित जुयाच्वंगु विद्युतीय नापं मेमेगु प्रयोजनया निंतिं तयातःगु तारत भूमिगत यायेगु नापं व्यवस्थित यायेगु ज्या न्ह्याकूगु खः ।

नगर दुनेया आपालं थासय् अव्यवस्थित व नगरया सौन्दर्यताय् हे समस्याया रुपय् दयाच्वंगु विद्युतीय तारलिसें मेमेगु प्रयोजनया निंतिं तयातःगु तार व्यवस्थित यायेगु ज्या न्ह्याकूगु खः ।

किपू नगरपालिका व नेपाल विद्युत प्राधिकरण दथुइ जूगु सहमतिकथं किपू नगरया मुख्य मुख्य सतकय् च्वंगु विद्युतीय तार विद्युत प्रशारण व वितरण प्रणाली सुदृढीकरण आयोजना अन्तर्गत विद्युतीय तार प्रणालीयात व्यवस्थित यायेगु ज्या न्ह्याकूगु खः ।

थुगु ज्याझ्वः अन्तर्गत न्हापांगु चरणय् नगांनिसें हिल्चा (भत्याक्यापाटी) तक छुगांनिसें धःपाः चुक तक व किपू चक्रपथ लागाय् अव्यवस्थित रुपं दयाच्वंगु तार भूमिगत यायेगु ज्या जुइगु किपू नगरपालिकां न्ह्यथंगु दु ।