ठेकेदार हडतालं विकास निर्माण ठप्प

येँ – सरकारं निर्माण सम्बन्धी कानूनय् याःगु संशोधन लित कायेमाः धकाः ठेकेदारत आन्दोलनय् कुहां वयेवं देय्न्यंकंया विकास निर्माणया ज्या ठप्प जूगु दु । तर ठेकेदारतय्सं धाःसा विकासया ज्या थःपिंसं ठप्प यानागु मखु धासें सरकारं याःगु कानूनया संशोधनं थ्व थः हे ठप्प जूगु खः धकाः द्वपं बिउगु दु ।

५० प्रतिशत ज्या सिमधःगु ठेक्काया म्याद थपे मयायेगु धकाः सरकारं न्हूगु कानून हयेवं अज्याःगु सम्पूर्ण विकासया ज्या ठप्प जूगु खँ ठेकेदारतय्सं धाःगु दु । थौंकन्हय् नेपालय् सञ्चालित २००० गू स्वयां अप्वः विकास निर्माणया ज्या थुकिं यानाः ठप्प जूगु दु ।

ठेकेदारतय्सं इलय् ज्या सिमधयेकूगु कारणं म्याद थपे मयायेगु निर्णय सरकारं याःगु खःसां ठेकेदारतय्सं धाःसा सिधःगु ज्याया भुक्तानी तकं सरकारं इलय् मयाइगु व अप्वः थासय् ज्या शुरु यायेधुंकाः जंगल कटान वा जग्गा प्राप्त यायेत थाकुइगु कारणं इलय् ज्या सिधयेकेत थाकुइगु खँ धाःगु दु ।

ठेकेदार हडतालं यानाः विकास निर्माणया ज्या ठप्प जूगुलिं सरकारं थुगु दँय् नं विकास बजेट बांलाक खर्च याये मफइगु सम्भावना दुगु खँ धाःगु दु । सरकारं बजेट हःगु न्याला दयेधुंकूगु थ्व इलय् नं विकास बजेट धाःसा मुक्कं ६ प्रतिशत जक खर्च जूगु दु । तर ठेकेदारतय्सं धाःसा थःपिंसं ज्या सिधयेके धुंकूगु प्रोजेक्टया ध्यबा जक इलय् पुला बिल धाःसां नं थ्व खर्च अप्वयाः २० प्रतिशत तक थ्यनीगु दावी याःगु दु ।