किपू व चन्द्रागिरि नगरपालिका स्वाइगु ताँया शिलान्यास

किपू- किपू व चन्द्रागिरि नगरपालिका स्वाइगु दीखु ताँया शिलान्यास याःगु दु । भौतिक पूर्वाधार व यातायात मन्त्री वसन्तकुमार नेम्वाङं उगु ताँया शिलान्यास यानादीगु खः । २०७७ साल जेठ मसान्ततकया दुने निर्माण सम्पन्न यायेगु लक्ष्य कयातःगु ११ मिटर ब्या व २५ मिटर हाकः दुगु ताँया निर्माणया ठेक्का वाइबा व लामा कन्स्ट्रक्सनं काःगु खः । ३ गू करोड ४४ गू लाख लागतय् ताँ निर्माण यायेगु त्यंगु खः ।

शिलान्यास यानादिसें मन्त्री नेम्वाङं देय्न्यंकं थुकथंया ताँ दयेकेगु ज्या न्ह्याकेमाःगु खँय् बः बियादिसें आपालं थासय् ताँ निर्माण यायेगु ज्या जुयाच्वंगु जानकारी बियादिल । थौंकन्हय् स्वनिगलय् धू ब्वयेगु म्हो जूगु महसुस जुया वयाच्वंगु धासें वय्कलं मन्त्रालयं इच्छा याःसां सहरया दुने दुने गल्लिया सतक धाःसा दयेके फयाच्वंगु मदु धयादिल ।

येँ क्षेत्र नं. ९ या सांसद कृष्णगोपाल श्रेष्ठं चुनावय् थःथःगु ध्वाँय् ज्वंसां विकास निर्माणया ज्याय् सकलें छप्पँ जुयाः न्ह्याः वनेमाःगु खँय बः बियादिसें इलय् हे ताँ निर्माण यानाः मन्त्री नेम्वाङपाखें हे उलेज्या याकेगु प्रतिवद्धता प्वंकादिल । ज्याझ्वःया सभापतिया थासं किपू नगरपालिकाया प्रमुख रमेश महर्जनं चन्द्रागिरि नगरपालिकाया तीनथान–नैकापं किपू स्वाइगु थ्व ताँ निर्माणया आपालं महत्व दुगु खँ कनादिल । निगू नगरपालिकाय दथुइ व्यापारिक दृष्टिकोणं अतिकं महत्वपूर्ण जूगु धासें वय्कलं ताँ निर्माण लिपा निगु नगरपालिका दथुइ भौतिक जक मखसे व्यापारिक सम्बन्ध नं स्वाना वनी धयादिल ।