ने. सं. ११४३ तछलाथ्व त्रयोदशी -

प्रा. माणिकलाल श्रेष्ठ मन्त

येँ- वाम बुद्धिजीवी लिसें नेपालभाषाया समालोचक प्रा. माणिकलाल श्रेष्ठ मन्त । वंगु निवाः न्ह्यवंनिसें वय्कःयात मेडिसिटी अस्पतालय् तयाः वासः याकातःगु खःसा छुं न्हि न्ह्यवंनिसें वय्कः कोमाय् लाःगु खः । कोमाय् लालां हे थौं मंगलवाः सुथय् ७ बजे वय्कः मदुगु खँ वय्कःया छेँजःपिंसं धाःगु दु ।
भाजु श्रेष्ठ ८९ दँ दुम्ह खः ।

भाजु श्रेष्ठ वामपन्थी राजनीतिया प्रख्यात ज्ञाता खःसां दलीय रुपं धाःसा वय्कः छुं नं पार्टीलिसे आवद्ध जुया मदी । अथे खःसां छगू इलय् वय्कलं वाम एकताया लागिं तःधंगु कुतः यानादीगु खः ।

नेपालभाषाय् वय्कःया कृति ‘समालोचनाया सिद्धान्त’ अतिकं लोकंह्वाः । प्रा. श्रेष्ठं छगू इलय् नेपालभाषा केन्द्रीय विभागय् साहित्य विषय अध्यापन यानादीगु खः ।

वय्कलं फत्तेबहादुर सिंहया सम्पादनय् पिहां वइगु ‘नेपालभाषा पत्रिका’ य् नं तःदँ ज्या यानादीगु खः । ०१७ साल स्वयां न्ह्यः तत्कालीन काठमाडौं नगरपालिकाय् वय्कः निर्वाचित वडा सदस्य खःसा उगु इलय् नगरपालिकाय् नेपालभाषायात नं मान्यता बीकेगु ज्याय् वय्कलं विशेष भूमिका म्हितादीगु खः ।
वय्कः कानून व पत्रकारिता ख्यलय् नं छुं ई आवद्ध जुयादिल ।

वय्कःया जहान मय्जु सिलु नेपाःया न्हापांम्ह मिसा न्यायाधीश खः । मय्जु सिंह थनिं निदँ न्ह्यः तिनि मदुगु खः ।

मदुम्ह प्रा. श्रेष्ठया निम्ह काय्पिं दी । तःधीम्ह काय् डा. मलखलाल श्रेष्ठ जर्मनीइ चिकित्सा ख्यलय् आवद्ध जुयादी । प्रा. श्रेष्ठया अन्तिम संस्कार सम्बन्धी ज्याखँ तःधीम्ह काय् लिहां वयेकाः जक याइगु खँ धाःगु दु ।