द्यःछेँ दनेत न्यागू लाख चन्दा

ख्वप – ख्वप नगरपालिका ९ वडास्थित वाथिकुथि लिबिइ च्वंम्ह तलातुंथि गणेद्यःया छेँ निर्माणया निंतिं पहल शुरु जूगु दु । थनया नांजाःम्ह थुम्ह गणेद्यःया द्यःछेँ निर्माणया निंतिं न्ह्यःनेया ब्व तयार यायेत तेराकोता बुट्टाया अप्पा छायेपीगु ज्या नं न्ह्यायेधुंकूगु दु । द्यःछेँया निंतिं मदुम्ह रामभक्त किसि प्रजापतिया नामं वय्कःया जहान मोहनवेटी प्रजापति व कायपिं विष्णुप्रसाद प्रजापति व मोहनप्रसाद प्रजापतिं न्यागू लाख तका दां चन्दा कथं लःल्हामनादीगु खः । द्यःछेँया थाय् थासय् गणेश व कुमारया मूर्ति तयाः दयेकेत्यंगु उगु द्यःछेँया निंतिं प्रजापति परिवारं निगू लाख तका दां व स्वंगू लाखया चेक लःल्हानादीगु द्यःछेँ निर्माण समितिया अध्यक्ष गौतम प्रजापतिं कनादिल । मध्यपुर थिमिया सन्तकुमार प्रजापतिं द्यःछेँया निंतिं आवश्यक तेराकोटा अप्पा तयार यानादीगु खःसा देशय् गनं हे मदुगु थेंज्याःगु सेरामिक्सया सामान उपलब्ध यानाबीगु स्थानीय अशोक प्रजापतिं बचं बियादीगु दु ।