त्रिपिटकया सफू विमोचन

यल – पालि–नेपालभाषा शब्दकोश व बुद्ध धर्मया तःजिगु ग्रन्थ त्रिपिटकया निगू महत्वपूर्ण सफू ‘महावग्ग’ व ‘यमक’ म्हिगः छगू ज्याझ्वःया दथुइ विमोचन जुल । सफूया प्रकाशक वीर–पूर्ण पुस्तक संग्रहालयया ग्वसालय् जूगु उगु ज्याझ्वलय् मूपाहां कथं भिक्षु ज्ञानपूर्णिक महास्थवीर बिज्याःगु खःसा पाहां कथं यल महानगरपालिकाया मेयर चिरिबाबु महर्जन व विशेष पाहां कथं वाङ्मय शताब्दीपुरुष सत्यमोहन जोशीं मंकाः कथं स्वंगुलिं सफूया उलेज्या यानादीगु खः ।

पालि–नेपालभाषा शब्दकोश बौद्ध विद्वान दुण्डबहादुर बज्राचार्यं सम्पादन यानादीगु खःसा निगू सफू मध्ये अनागारिका विमलञाणी शासनधज धम्माचरियं ‘यमक’ व अनागारिका उप्पलवण्णां (चिनी गुरुमां) ‘महावग्ग’ यात पालिपाखें नेपालभाषाय् अनुवाद यानादीगु खः ।

अनुरत्न वज्राचार्यं लसकुस यासें न्ह्याकूगु उगु ज्याझ्वलय् चन्द्रगुप्त महास्थवीर, रत्नाकर विहारया आजु सिद्धिरत्न बज्राचार्र्य्पं बिज्याःगु खः । पिदंगु शब्दकोषयात कयाः ज्ञानपूर्णिक महास्थवीर व गुरुमां विमलाञाणीपिसं नुुगःखँ तया– बिज्याःगु खः । दुण्डबहादुर बज्राचार्यं २१ द्वः खँग्वः दुगु पाली शब्दकोषया महत्व बारे जानकारी बियादिल ।