अपर्णा प्रधानया स्वंगू सफू पिदन

यल(नेपालभाषा टाइम्स)- नांजाःम्ह मिसा साहित्यकार अपर्णा प्रधानया छगू हे ज्याझ्वलय् स्वंगू सफू पिदंगु दु । वंगु सोमवाः महालक्ष्मी ब्यांक्वेटय् जूगु छगू ज्याझ्वःया दथुइ साहित्यकार प्रधानया स्वंगू व वय्कःया गुंगू सफूयात कयाः च्वयातःगु समालोचना सफू नं पिथंगु खः ।

वरिष्ठ साहित्यकार हितकर वीर सिंह कसाःया सभापतित्वय् जूगु ज्याझ्वलय् मूपाहां समाजसेवी कृष्णलाल प्रधान, भाषाविद् सुन्दरकृष्ण जोशी, समालोचक पूर्ण ताम्राकार, साहित्यकारद्वय सुलोचना मानन्धर व जलेश्वरी श्रेष्ठं मंकाःकथं उगु सफू पितब्वज्या याःगु खः ।

ज्याझ्वलय् साहित्यकार अपर्णा प्रधानया किपा (समालोचना मुना), क्वाःघासा (निबन्ध मुना), जीवनया यात्रा (चिबाखं मुना) सफूया पितब्वज्या याःगु खःसा वय्कःया गुंगू सफूया समीक्षा यानाः समलोचक पूर्ण ताम्राकारं च्वयादीगु ‘क्वाति’ सफूया नं पितब्वज्या याःगु खः ।

पितब्वज्या जूगु सफूयात कयाः मूपाहां, पाहांलिसें थीथी वक्तापिंसं नुगःखँ तयादीगु खःसा कुतः पिकाकःया विमल ताम्राकारं ज्याझ्वलय् लसकुस यानादीगु खः ।