प्रमया लेटरहेडय् नेपाल संवत् छ्यलेत देउवा सहमत

येँ – प्रधानमन्त्री शेरबहादुर देउवां नेपाःया मौलिक राष्ट्रिय संवत् नेपाल संवत् प्रधानमन्त्रीया लेटरप्याडय् छ्यलेगु व मन्त्रिपरिषदया बैठकं याइगु थीथी निर्णयया निर्णय पुस्तिकाय् नेपाल संवत नं छ्यलेगु छुं तःधंगु खँ मखु धयादीगु दु ।

म्हिगः वय्कःयात नापलाः वंपिं नेपाल संवत् राष्ट्रिय न्हूदँ समारोह समिति ११४२ या अध्यक्ष निरञ्जनरत्न शाक्य नेतृत्वया न्हूदँ समारोह समितिया दुजःपिंलिसें प्रधानमन्त्री निवास बालुवाटारय् खँल्हाबल्हा यासें वय्कलं थ्व खँ धयादीगु खः ।
प्रधानमन्त्री देउवां थःगु बिचाः तसें थः स्वकीय सचिवयात तत्काल थुकिया बारे बिचाः यानाः कार्य सम्पादन व कार्यान्वयन यायेत निर्देशन नं बियादीगु दु ।

नेवाः न्ह्यलुवा मल्ल के. सुन्दरं प्रधानमन्त्री देउवायात नेपाल संवत ११४२ न्हूदँया लसताय् व वय्कःया कार्यकालय् म्होतिं नं प्रधानमन्त्रीया लेटरप्याडय् नेपाल संवत छ्यलेगु, मन्त्रिपरिषदया निर्णय पुस्तिकाय् नेपाल संवत नं न्ह्यथने बीगु व नेपाःया नोटय् नेपाल संवत नं तयेत इनाप यानादीगु खः ।

न्हूदँ समारोह समितिया अध्यक्ष निरञ्जनरत्न शाक्यं नेपाःया मौलिक संवत नेपाल संवत न्हूदँया लसताय् थ्वहे वइगु म्हपुजा (कार्तिक १९ गते) कुन्हु येँया बसन्तपुली जुइगु सभाय् मूपाहां जुयादीत इनाप यानादीगु खःसा प्रम देउवां उकियात स्वीकार यानादीगु खः । अथे हे समारोह समितिं लःल्हाःगु नेपाल संवत सम्बन्धी ध्यानाकर्षण पौयात नं थम्हं सकारात्क रुपं कयागु खँ प्रम देउवां कनादिल ।