ल्हासा नेवाः सम्पदाया शुटिङ क्वचाल
येँ (नेपालभाषा टाइम्स) – संसारया हे दकलय् तजाःगु थासय् च्वंगु नगर धयातःगु ल्हासाय् नेवाः भाय्या फिल्म शुटिङ यायेगु ज्या जूगु दु । नेपालभाषाया संकिपा ‘च्वापुफय्’ या शुटिङ नकतिनि अन क्वचायेकाः फिल्म युनिट ये“य् थ्यंकः वःगु दु । ल्हासाया पोताला दरबार, जोखाङ देगः, भाखो बजाः व रामोचे गुम्बानापं नेवाः कलासंस्कृतिनाप स्वापू दूगु थीथी थासय् फिल्मांकन जूगु खँ महाजु फाउण्डेशनया नायः, संकिपाया च्वमि÷परिकल्पनाकार व कार्यकारी निर्माता ओमचरण अमात्यं कनादिल ।
ल्हासानाप नेवाःतय्सं थनिं झिंस्वसःद“ न्ह्यवंनिसें न्ह्याका वःगु धार्मिक, सामाजिक व सांस्कृतिक स्वापूयात विश्वय् न्ह्यब्वयेगु लिसें ल्हासा–तिब्बतया विकासय् नेवाः जातिं बियावंगु योगदानयात ब्वयेगु नं थ्व संकिपाया उद्देश्य जूगु खँ नं भाजु अमात्यं कनादिल ।
लुमंकेबहः जू, ल्हासाया नांजाःगु पोताला दरबार, जोखाङ देगः व रामोचे गुम्बा लगायत तिब्बतया आपालं सम्पदाया डिजाइन व निर्माणय् भृकुटीनापं वंपिं व लिपा थीथी इलय् वंपिं नेवाः कालिगढतय्सं आपालं ज्य याःगु दु ।
थुपिं ऐतिहासिक सम्पदा दुने क्यामेरा यंके मबिउगुलिं मनंतुना थें फिल्मांकन धाःसा याये मखंगुलिं आः भीएफ्एक्स प्रविधि छ्यलाः उकिया पूर्ति यायेगु खँ नं वय्कलं कनादिल ।
निसःद“ न्ह्यःया म्येहना बाखं ‘जि वया ला लच्छि मदुनि’ या लिधंसाय् दयेकाच्वंगु थ्व संकिपाय् दुथ्याके माःगु आपालं दृश्यत आः मदयेधुंकूगुलिं थुकी भीएफ्एक्स प्रविधि अप्वः छ्यलेत्यंगु दु ।
‘भीएफएक्स प्रविधि छ्यलेगु ल्याखं नं ‘च्वापुफय्’ संकिपां नेपाःया हे फिल्म निर्माणय् छगू कीर्तिमान तयेत्यंगु दु,’ अमात्यं कनादी, ‘नेवाः संकिपा जक मखु, नेपाःया मेगु छुं नं संकिपाय् भीएफ्एक्स प्रविधिया थुलिमछि प्रयोग जूगु मदुनि ।’
भीएफ्एक्स प्रविधिया यक्व प्रयोग जक मखु, फोर–के क्यामेराया प्रयोग, मुस्ताङ व ल्हासा थेंज्याःगु हाइ अल्टिच्युट लागाय् वनाः शुटिङ, छक्वलं हे झिंखुम्ह सल व खच्चरया प्रयोग, ड्रोनया माध्यमं फिल्मांकन व थ्यंमथ्यं निसःम्ह कलाकार व प्राविधिकया सहभागिता लगायतया हुनिं नं ‘च्वापुफय्’ नेवाः संकिपा ख्यलय् छगू न्हूगु ‘माइलस्टोन’ जुइगु दावी निर्माण पक्षया दु ।
थ्व संकिपा नेपालभाषा, खस, चिनीया“ व अंग्रेजी भासं पित बीगु तयारी जुयाच्वंगु दु । संकिपा वइगु मोहनि न्ह्यः रिलिज जुइगु अनुमान दु ।
LEAVE YOUR COMMENTS