ने. सं. ११४४ कौलाथ्व दशमी - स्याक्वत्याक्व

बाँसबारीया १० रोपनी जग्गा गुकथं निजी दयेकल ?

बाँसबारी छाला जुत्ता कारखानाया झिगू रोपनी जग्गा हिनामिना याःगु द्वपनय् खर्बपति ब्यापारी विनोद चौधरीया किजा अरुणा चौधरीयात प्रहरीया केन्द्रीय अनुसन्धान ब्यूरो (सिआईबीं) ज्वनेवं थ्व प्रकरण तसकं चर्चाय् वयाच्वंगु दु । प्रहरी सूत्रतय् कथं थ्व प्रकरणय् विनोद चौधरीयात तक हे च्वनीगु सम्भावना दु । अझ अरुणयात ज्वने न्ह्यः विनोद चौधरीयात हे ज्वनेगु तयारी जूगु खःसां छक्वलं वयात थ्यंक ल्हाः मतसे अरुणायात निं ज्वंगु खः धयागु नं चर्चा जुयाच्वंगु दु । थ्व झ्वलय् सिआइबीं थ्व प्रकरणय् मेपिं मनूतय्त ज्वनेफु धकाः धाःगु दु । थ्व प्रकरणय् प्रहरीं आःतक स्वम्हेसिन ज्वनेधुंकूगु दुसा मेपिंत कयाः नं अनुसन्धान जुयाच्वंगु खँ धयाच्वंगु दु ।

बाँसबारी छाला जुत्ता उद्योग संचालनया निंतिं तत्कालिन श्री ५ या सरकारं १८ रोपनी ३ आना २ पैसा जग्गा उद्योगयात बिउगु खः । थुकी मध्ये १० रोपनी जग्गा बाँसबारी छाला जुत्ता कारखानाया तत्कालिन अध्यक्ष अजितनारायण सिंह थापा व चौधरी परिवार दथुइ वि.सं. २०४३ भदौ १३ गते जूगु सहमति कथं चौधरी परिवारया बहुमत शेयर दुगु कम्पनीइ वंगु सिआइबीया दाबी दु । चौधरी परिवारयात जग्गा लःल्हायेगु ज्याय् मू ल्हाः दुम्ह थापायात नं प्रहरीं ज्वनेधुंकूगु दु ।

थापा अध्यक्ष जुयाच्वंगु इलय् स्पोर्टस लाकां दयेकेगु धकाः चौधरी परिवारया साझेदारीइ बाँसबारी छाला जुत्ता कारखानासहित च्याम्पियन्स फुटवेयर कम्पनी दयेकूगु खः । थुकीया निंतिं अरुण चौधरीया अबु लुनकरणदास चौधरी व बाँसबारी छाला जुत्ता कम्पनी दथुइ छगू सम्झौता जूगु खः । कम्पनीया ५१ प्रतिशत शेयर चौधरी परिवारयागु, २५ प्रतिशत शेयर बाँसबारी छाला जुत्ता कारखानायागु व २४ प्रतिशत शेयर सर्वसाधारणया निंतिं छुटे यायेगु कथं सम्झौता जूगु खः । थ्व सम्झौता कथं बाँसबारीं थःगु शेयर २५ लाख तका बराबरया झिगू रोपनी जग्गा च्याम्पियन्स फुटवेयर कम्पनीइ तल, अले थुकिया उत्पादनया प्रचार प्रसार यायेगु धकाः थप छगू लाख तका दां नं बिल । २०४३ सालय् बाँसबारीं न्हापां खुगू रोपनी व लिपा प्यंगू रोपनी यानाः झिगू रोपनी जग्गा च्याम्पियन्स फुटवेयर कम्पनीइ तःगु खः । उबलय् छगू रोपनी जग्गाया २ लाख ५० हजार मूल्यांकन यानाः २५ लाख तका बराबर शेयरया निंतिं झिगू रोपनी जग्गा तःगु खः ।

बाँसबारीपाखें २५ लाख तका बराबरया जग्गा च्याम्पियन्सय् वंसां चौधरी परिवारं धाःसा थःपिंसं प्रतिबद्धता प्वंकू कथं ध्यबा मतल । चौधरी परिवार व सर्वसाधारणयात शेयर मियाः ७५ लाख तका तयेमाःगु खः, तर चौधरी परिवारं मुक्कं च्यागू लाख दां जक तल । लगानीया प्रतिबद्धता कथं ध्यबा मतसे लाकां कम्पनीयात हे डुबे यायेगु खेल म्हितल । थ्व हे खेल कथं स्वदँ लिपा हे फुटवेयर कम्पनी बन्द यानाबिल ।

जग्गा हडपे यायेगु निंतिं जग्गा च्याम्पियन्स फुटवेयर कम्पनी दयेकूगु चौधरी परिवारं २०५२ साल थ्यंबलय् झिगू रोपनी जग्गां थःपिनि नामय् हयेत ताःलात । २०५२ साल साउन १२ गते मुक्कं ३६ लाख तका दां सरकारयात पुलां झिगू रोपनी जग्गां थःपिनि नामय् हःगु खः । थुकिया निंतिं उबलय् च्याम्पियन्स फुटवेयर कम्पनीया नामय् दुगु शेयर लिलामी याकेबियाः उगु लिलामीयात थःपिं हे प्यम्ह न्याम्ह मिले जुयाः लिलामीइ वनाः ३६ लाख दामं कम्पनीया शेयर सकारे यानाः जग्गा फुक्क थःपिनि नामय् यानाकाःगु खः ।

थ्व प्रकरणय् अनुसन्धान यानाच्वंगु सिआइबीं बाँसबारी छाला जुत्ता कारखानाया शेयर लगानी बापतया ३६ लाख तका दां सरकारयात बियाः कम्पनी हे थःपिनि नामय् हयाः जग्गाया स्वामित्व कायेगु खेल म्हितूगु दावी यानाच्वंगु दु ।

थ्व प्रकरणया अनुसन्धानया नेतृत्व यानाच्वंम्ह सिआइबीया वरिष्ठ उपरीक्षक (एसपी) दिनेश आचार्यं धाःगु दु, ‘बाँसबारी छाला जुत्ता कारखानाया नामय् दुगु २५ प्रतिशत शेयर लिलामी याकेबियाः थःपिं हे प्यम्ह न्याम्ह जक लिलामीइ वनाः ३६ लाख तकां अरुणाकुमारी चौधरीं शेयर न्यानाकाःगु खनेदु ।’

फुक्कं शेयर न्याना कायेधुंकाः २०५४ पुस ४ गते च्याम्पियन फुटवेयर कम्पनीयात अरुण चौधरीं निजी कम्पनीइ हिलाः पुलांगु हे दर्ता नम्बरय् दर्ता याकूगु खः । थुकियात लिपा नां हिलाः सिजी चाँदबाग रेजिडेन्सी दयेकूगु खः । थ्व हे थासय् थौंकन्हय् चौधरीं चाँदबाग स्कूल नं संचालन यानाच्वंगु दु । चाँदबाग रेजिडेन्सीइ स्वम्ह शेयरधनी दु । उकी मध्ये अरुण चौधरी व कम्पनीया अध्यक्ष जुयाच्वंम्ह महोत्तरीया संजय ठाकुरयात प्रहरीं ज्वंगु खः ।

प्रहरीं धाःकथं महालेखा परीक्षकं उबलय् हे थःपिनि प्रतिवेदनय् बाँसबारीया जग्गा मेगु कम्पनीयात बीगु सम्झौता अपारदर्शी जूगु व सरकारपाखें निर्णय नं मजूनिगु खँ न्ह्यथँगु खः ।

‘थुकी गुगु उद्देश्यं लगानी याःगु खः, उकिया प्रतिफल चूमलाःगु, लगानी याये धाःगु स्वयां अप्वः बाँसबारी पाखें लगानी जूगु, तर मेपिं साझेदारीपाखें याये धाःगु लगानी नं मवःगु धकाः लगातार महालेखाया प्रतिवेदनय् न्ह्यथँगु खः’ एसपी आचार्यं धाःगु दु ।

अरुण चौधरीयात ज्वनेधुंकाः याःगु पत्रकार सम्मेलनय् एसपी आचार्यं धाःगु दु, ‘थुकी छुं नं राजनीतिक तह वा तत्कालिन सरकारपाखें छुं नं कथंया निर्णय जूगु मदु । बाँसबारीया अध्यक्षं सरकारया निर्णय आवश्यक जुल धाःसा यायेगु धकाः फुटवेयरयात जग्गा बिउगु खनेदु । उकिं नं उबलय् थःपिनिगु भागया शेयर लगानी मयासें बाँसबारी छाला जुत्ता कम्पनीया झिगू रोपनी व मेगु च्यागू रोपनी नं जग्गा हड्पे यायेगु उद्देश्यं जक थ्व च्याम्पियन फुटवेयर स्थापना याःगु खनेदु ।’

प्रहरीया कथं च्याम्पियन फुटवेयर कम्पनीइ सुरुइ नेपाःया छम्ह जक खर्बपति ब्यापारी विनोद चौधरी व वया माहिलाम्ह किजा वसन्त चौधरीया नं शेयर दुगु खः । थुपिं निम्ह दाजुकिजया नामय् दुगु शेयर लिपा चिधिकःम्ह किजा अरुणं न्यानाकाःगु खः । विनोद चौधरी थौंकन्हय् नेपाली कांग्रेसपाखें प्रतिनिधि सभाय् सांसद जुयाच्वंगु दु । खर्बपति चौधरी नं थ्व प्रकरणय् अनुसन्धानया घेराय् लानाच्वंगु दुसा प्रहरीं अरुण चौधरीया कलाः शीला चौधरीयात कयाः नं अनुसन्धान यानाच्वंगु दु ।

चौधरी परिवारं उबलय् बाँसबारीया १८ रोपनी फुक्कं हे जग्गा कायेगु कुतः याःगु खः । तर स्थानीयतय् विरोधया कारणं च्यागू रोपनी जग्गा धाःसा कायेमफुगु खः । आः उगु जग्गाय् गंगालाल हृदयरोग केन्द्र दयेकातःगु दु ।

थ्व जग्गा बारे गंगालाल अस्पतालया चिकित्सक डा. भगवान कोइरालां थःगु सफू ‘हृदय’य् च्वःगु खः । कोइरालां गगंगालाल अस्पताल दयेकेगु निंतिं बाँसबारीया उगु झिगू रोपनी जग्गा नं कायेगु कुतः यानागु खःसां सफल जुइमफुगु खँ थःगु सफुलिइ न्ह्यथँगु खः । थ्व सफू सार्वजनिक जुइवं जग्गा हिनामिना प्रकरण नं पिहां वःगु खःसा थुगु थाय् लाःगु यँ महानगरपालिका वडा ४ या अध्यक्षलगायत स्थानीयतय्सं उजुरी तयेवं छानविन जूगु खः । छानविन लिपा प्रहरीं अरुण चौधरीलिसें बाँसबारीया तत्कालिन अध्यक्ष थापा व चाँदबागया अध्यक्ष ठाकुरयात ज्वंगु खः । उपिं स्वम्हेसितं आः किर्ते व ठगीया द्वपनय् अनुसन्धान जुयाच्वंगु दु ।