ने. सं. ११४४ कौलाथ्व दुतिया -

दाहालं सःतीन न्हापांगु बैठक

कार्यकारी अधिकार छ्यले फइगु खँय् अझं शंका
येँ – सत्तारुढ नेपाल कम्युनिष्ट पार्टीया अध्यक्ष पदय् कार्यकारी अधिकार समेत प्राप्त जुइ धुंकाः अध्यक्ष पुष्पकमल दाहालं थःगु हे पहलय् पार्टीया न्हापांगु बैठक सःतेगु तयारी यानादीगु खँ सीदुगु दु । वय्कलं दकलय् न्हापां पार्टीया सचिवालय बैठक निं सःताः थःगु कार्यक्रम प्रस्तुत यानादीगु खँ सूत्रं धाःगु दु ।

सचिवालय बैठक सःताः थःगु कार्यक्रम न्ह्यब्वयेगु लागिं वय्कलं तयारी समेत यानादीगु दु । वंगु छुं न्हि वय्कः छेँय् हे च्वनाः सचिवालय बैठकय् पेश यायेगु कार्यक्रम तयार यानादीगु खः । वय्कलं आः बाँकी दनिगु कार्य– कालय् थम्हं छु छु यायेगु व पार्टीयात छु छु याकेगु धइगु बारे स्पष्ट खाका प्रस्तुत यानादीगु खँ सूत्रं धाःगु दु ।

तत्कालीन एमाले व माओवादी एकीकरण जूगु इलय् प्रधानमन्त्री केपी ओली व दाहालया दथुइ प्रधानमन्त्री पद समेत बछि बछि सञ्चालन यायेगु सहमति जूगु खः । आः वयाः प्रमया पद ओलीयात पूरा त्वःताः पार्टीया अध्यक्ष पद धाःसा वय्कलं पूरा कयादीगु खः । आः पार्टीयात वय्कलं ओलीया हस्तक्षेप मदयेक थः यत्थे सञ्चालन यायेगु अवस्था वःगु खँ धाःगु दु ।

पार्टीया कार्यकारी अधिकार थःगु ल्हातय् वयेधुंकाः वय्कलं थः यत्थे ज्या यायेगु वातावरण दइ लाकि मदइ धइगु खँ धाःसा आः सीदइगु खँ धयाहःगु दु । अध्यक्ष दाहालं थः पार्टीया निम्हम्ह अध्यक्ष खःसां अन दुने फुक्क ज्या ओलीं हे याइगु व थम्हं केवल ओलीपाखें अ¥हे याःगु ज्या जक याये मालाः अपमान समेत महसुस याये मालाच्वन धकाः थः सतीपिं मनूतय्त कनेगु यानाच्वंगु खः ।

ओलीयात पूर्ण कार्यकाल छाय् ?
नेकपाया मेम्ह अध्यक्ष लिसें प्रधानमन्त्री केपी ओलीया स्वास्थ्य बांलाः मजूगु कारणं आः वय्कलं ‘आराम’ काये माल धकाः सुझाव वयाच्वंगु इलय् वय्कलं आराम कायेगु पलेसा झन् प्रधानमन्त्रीया ल्यं दनिगु अवधि तकं थम्हं हे चले याये धकाः निर्णय याःगु खनाः वय्कःयात आरामया सल्लाह बियाच्वंपिं मनूत अजूचाःगु दु ।

नापं वय्कलं स्वास्थ्यस्थिति बांलाः मजूगु इलय् नं छाय् झन् पूरा कार्यकाल प्रधानमन्त्री जुइगु धकाः अडान कयादिल धइगु खँ नं रहस्यमय जूगु खँ सूत्रं धाःगु दु । दाहालयात पार्टीया पूरा जिम्मा बिउगुलिं आः सरकारया पूरा जिम्मा वय्कःयात वःगु दु ।

आरामया खँ वयाच्वंगु इलय् वय्कलं झन् अप्वः जिम्मेवारी क्वबीगु ज्या छाय् यानादिल धइगु बारे धाःसा पार्टी दुने हे थीथी कथंया खँ पिहां वयाच्वंगु दु । प्रम ओली आः याकनं हे प्रधानमन्त्री पदया कार्यवाहक मेम्हेसित बियाः स्वास्थ्य उपचारया लागिं पिहां झायेत्यंगु दु ।