बाँसबारी कारखानाया जग्गा हिनामिना ः विनोद चौधरी सालेफु ?
येँ (नेपालभाषा टाइम्स)-नेपाःया छम्हयां छम्ह जक खर्बपति ब्यापारी विनोद चौधरीया किजा अरुण चौधरीयात बाँसबारी छाला जुत्ता कारखानाया जग्गा हिनामिना याःगु द्वपनय् प्रहरीया सीआईबीं ज्वनेवं देय्या राजनीतिइ हे हल्लाखल्ला जूगु दु । चौधरीयात ज्वंगु खँय् उद्योग वाणिज्य महासंघं छुं न्ववाःगु मदुसां चौधरीया पकडय् दुगु नेपाल उद्योग परिसंघं धाःसा विरोध प्वंकूगु दु ।
लिसें कांग्रेसया सांसद समेत जुयादीम्ह व्यापारी विनोद चौधरीं नं कांग्रेस संसदीय दलया बैठकय् न्ववासें जग्गा विवादया नामय् थःगु परिवारयात बदनाम यायेत स्वःगु द्वपं बियादीगु दु । सरकारपाखें थःगु घरानियायात प्रतिशोध कायेत स्वःगु धासें वय्कलं बाँसबारी छाला जुत्ताया जग्गा थःपिंसं लिजय् कयागु व उकिया सम्पूर्ण कानुनी प्रक्रिया पूवंगु नं दावी यानादिल ।
विनोद चौधरीया किजा अरुण चौधरीयात ज्वनेवं गुलिखे सांसद व मन्त्रीतय्सं हे प्रधानमन्त्री पुष्पकमल दाहालयात न्ह्यसः तयाः कायल यानाच्वंगु खँ सीदुगु दु । चौधरीयात ज्वंगु खँय् स्वयम् अर्थमन्त्री डा. प्रकाश शरण महत तकं असन्तुष्ट जूगु खँ नं धाःगु दु । वय्कलं गृहमन्त्री नारायणकाजी श्रेष्ठयात नापलानाः थःगु असन्तुष्टि प्वंकादीगु खँ सीदुगु दु । थुकिं यानाः नेपालय् जुइत्यंगु लगानी सम्मेलन प्रभावित जुइगु व उकी भारतया तःधंगु व्यापारी परिवारं ब्वति काइगु सम्भावना मदुगु खँ नं डा. महतं धयादीगु सीदुगु दु ।
थ्वहे झ्वलय् छगू विशिष्ट सूत्रं धाःकथं थ्व प्रकरणय् सरकारं स्वयम् विनोद चौधरीयात हे ज्वनेगु तयारी यानाच्वंगु खः । तर अन्तिमय् वनाः ज्वने माःम्ह मनू हे हिलाः किजाम्ह अरुण चौधरीयात ज्वंगु खँ सूत्रं धाःगु दु । आः अरुण चौधरीया विषयय् छानबिन यायां वनीबलय् विनोद चौधरी समेत साले फइगु खँ धाःगु दु । थ्व विषयय् प्रहरीं वंगु निदँ न्ह्यवंनिसें शूक्ष्म अध्ययन यानाच्वंगु व उकिया हे आधारय् आः कारवाही न्ह्याकूगु खः ।
थ्वहे झ्वलय् उपप्रधान लिसें गृह मन्त्री नारायणकाजी श्रेष्ठं भ्रष्टाचार याःगु प्रमाण सहित सुं तःधंम्ह मनूयात ज्वनेसातकि राजनीतिक दबाब समेत वइगु बांलाःगु खँ मखु धकाः असन्तोष प्वंकादीगु दु ।
LEAVE YOUR COMMENTS