मधेसय् सरकारी भाषाया तयारी

येँ (नेपालभाषा टाइम्स)- मधेश प्रदेश सरकारया मुख्यमन्त्री सतिश सिंहं मधेश प्रदेशया सरकारी ज्याखँया भाय् याकनं लागू यायेगु खँ धयादीगु दु । सरकारी ज्याखँया भाय्या बारे ध्यानाकर्षण याकेत वंगु इन्टेलेक्चुअल फाउन्डेसन नेपाःया प्रतिनिधि मण्डललिसे खँ ल्हासें मुख्यमन्त्री सिंहं उगु खँ धयादीगु खः । मधेश प्रदेशय् छु छु भाय्यात सरकारी भाय् कथं लागू याना यंकेगु धइगु खँ तयारी अवस्थाय् दुगु व याकनं हे लागू यायेगु खँ नं मुख्यमन्त्री सिंहं धयादीगु खः ।

सरकारं मधेश प्रदेशय् मैथिली, भोजपुरी व बज्जिका लिसें मेगु च्यागू भाय्यात मान्यता बीगु धकाः धलः तयार यानातःगु दु । उकी मध्ये हे सरकारी ज्याखँया भाय् कथं छ्यलेगु तयारी यानाच्वंगु खँ फाउन्डेसनया अध्यक्ष डा. सूर्यप्रसाद यादवं कनादीगु दु ।

भाषा आयोगं मधेश प्रदेशया नितिं सरकारी भाय् कथं मैथिली, भोजपुरी व बज्जिकायात सिफारिस यानातःगु दु । छुं ई न्ह्यः तिनि भाषा आयोगया अध्यक्ष डा. गोपाल ठाकुर नं मधेस प्रदेश झायाः सरकारी ज्याखँया भाषा सम्बन्धी कानून दयेकेत इनाप यानादीगु खः ।

फाउन्डेसनं सरकारी भाषा सम्बन्धी कानून हयेगु लागिं मधेश प्रदेशया शिक्षा मन्त्री रानी शर्मा तिवारीयात नं ध्यानाकर्षण याकूगु खः ।
थुकथं हे सरकारी ज्याखँया भाय् सम्बन्धी कानुन दयेकेगु लागिं गण्डकी प्रदेशय् नं तयारी शुरु जूगु खँ सीदुगु दु । गण्डकी प्रदेशय् भाषा आयोगं गुरुङ व मगः भाय्यात सरकारी ज्याखँया भाय् दयेकेगु धकाः सिफारिस यानातःगु दु । गुरुङ व मगः समुदायं थःपिनि भाषाय् छु लिपियात आधिकारिक माने यायेगु धकाः नं क्वःछीधुंकूगु खँ धाःगु दु ।

उकथं हे प्रदेश नं. १ (कोशी) सरकारं नं सरकारी ज्याखँया भाषा सम्बन्धी कानुन हयेत तयारी यानाच्वंगु खँ सीदुगु दु । १ नम्बर प्रदेशय् थ्व कानुन हयेगु लागिं ताः ई न्ह्यः हे तयारी जूगु खःसां लगातार जुयाच्वंगु सरकार परिवर्तन व ‘कोशी’ नां विरुद्धया आन्दोलनं यानाः ज्या न्ह्याः वने मफयाच्वंगु खः ।

बागमतिइ छु जुयाच्वन ?
थीथी प्रदेशय् सरकारी ज्याखँया भाय् छु जुइमाः धकाः भाषा आयोगं याःगु सिफारिसया आधारय् दकलय् न्हापां कानुन दयेकाः पारित याःगु प्रदेश बागमती खः । बागमती प्रदेशं भाषा कानुन दयेकाः लागू समेत यायेधुंकूगु दुसां व्यवहारय् हयेत धाःसा अझ नं छुं कथंया प्राविधिक समस्या जुयाच्वंगु खँ सीदुगु दु ।

प्रदेशय् छुं ई न्ह्यः तिनि सरकार परिवर्तन जूगु व थीथी मन्त्रालयया सचिवत समेत हिलाबुला जुयाच्वंगुलिं ज्या यायेत समस्या जुयाच्वंगु खँ धाःगु दु । बागमती प्रदेशय् नेपालभाषा व तामाङ भाय्यात सरकारी ज्याखँया भाषा दयेकेगु कथं कानुन पारित यायेधुंकूगु दुसा आः थ्व निगुलिं भाषायात थीथी स्थानीय तहलय् समेत लागू याना यंकेगु लागिं सरकारपाखें बजेट समेत व्यवस्थापन यायेधुंकूगु दु ।