न्हूगु ताँय् तार जाली तयाः बन्द

येँ – थनया टेकुइ दयेकूगु न्हूगु ताँय् सतक विभागं दथुइ बार तयाः वये–वने मजीक बन्द याना बिउगु दु । पप्पु कन्स्ट्रक्सनं दयेकूगु उगु ताँ सतक विभागं मापदण्ड अःखः जूगु धासें थुनेत निर्देशन बिउगु खःसां ठेकेदार कम्पनीं चांचां दयेके क्वचायेकूगु खः । ताँ दयेकेगु झ्वलय् माःगु मापदण्ड नाला मकाःगु धासें सतक विभागं उगु ताँय् सवारी चले याके बीमते धकाः ट्राफिक प्रहरीयात इनाप याःगु खःसां निर्वाध रुपं सवारी साधन चले जुयाच्वंगु खः ।

तर थुकिं यानाः गुगुं नं इलय् दुर्घटना जुइ फइगु धासें आः सतक विभाग थम्हं हे ताँया दथुइ ल्वहं व तारजाली तयाः लँ बन्द याना बिउगु दु ।
सतक विभागं उगु ताँ थुनाः हाकनं दयेकेमाः धयाच्वंगु दु । तर ठेकेदार कम्पनीं उकियात वेवास्ता याःगुलिं विभागं कारबाही यायेगु ख्याच्वः बिया वयाच्वंगु खः ।

थ्वहे झ्वलय् मापदण्ड अःखः दयेकूगु उगु ताँयात रेक्टोफिटिङ यानाः सञ्चालन याःसां जिउ धकाः भौतिक तथा पूर्वाधार मन्त्री रघुवीर महासेठं सतक विभागयात दबाब बियाच्वंगु खँ सीदुगु दु ।

तर विभागं गुगुं नं इलय् जनधनया क्षति जुइ फइ धासें उकियात स्वीकृति बीमफइगु अडान कयाच्वंगु दु । रेक्टोफिटिङ याःसां नं ताँया गुणस्तर वृद्धि जुइगु सम्भावना मदु धासें विभागं ताँ थुनाः मेगु दयेकेगु बाहेक विकल्प मदु धकाः अडान कयाच्वंगु खँ नं सूत्रं धाःगु दु ।