सत्यमोहनया वृत्तचित्र आशा सफूकुथियात

येँ(नेपालभाषा टाइम्स)- वाङ्मय शताब्दी पुरुष डा. सत्यमोहन जोशीया जीवनीयात कयाः दयेकातःगु भिडियो (वृत्तचित्र) आशा सफूकुथियात लःल्हाःगु दु । शताब्दी पुरुष जोशीया जीवनीयात कयाः दयेकातःगु ‘म्वानाच्वंगु इतिहास’ नांया वृत्तचित्रलिसें वृत्तचित्र निर्माणया इलय् मुंकातःगु वय्कःलिसे स्वापू दुगु श्रव्यदृश्य आशा सफूकुथियात अभिलेखीकरणया निंतिं लःल्हाःगु खः ।

वृत्तचित्र निर्माण समितिया नायःलिसें नेपालभाषा एकेदेमिया सदस्य सचिव डा. पुष्पराज राजकर्णिकारया सभापतित्वय् जूगु ज्याझ्वलय् नेवाः न्ह्यलुवालिसें नेपालभाषा एकेदेमिया भाइस चान्सलर मल्ल के. सुन्दर मूपाहांकथं झायादीगु खः । ज्याझ्वलय् वृत्तचित्र निर्माण समितिया कजि डा. राजकर्णिकारं सफूकुथिया छ्याञ्जेलिसें नेपालभाषाया पुलांगु साहित्यिक संस्था च्वसापासाया नायः वरिष्ठ साहित्यकार भूषणप्रसाद श्रेष्ठयात उगु वृत्तचित्र लःल्हानादीगु खः ।

ज्याझ्वलय् नवासें मू पाहां मल्ल के. सुन्दरं झी नेवाःत भाषा, जाति, कला, संस्कृति, पहिचान, नसात्वँसा, पुँसा, जात्रा, पर्व आदि अनेक विषयय् तःमि धकाः गर्व यायेगु यानाच्वनासां उकिया अभिलेखीकरण यायेगु ज्या मजुयाच्वंगु खँय् चिउताः प्वंकादिल । वय्कलं सकतां ख्यलय् तःमि धकाः गर्व याये सःपिं झी नेवाःत उकियात अखिलेखीकरण यायेगु खँय् लिउने लानाच्वंगु जक मखसे अज्याःगु प्रवृत्ति हे मदु धयादिल ।

सफूकुथिया छ्याञ्जे भूषणप्रसाद श्रेष्ठं दकलय् न्हापां न्युजिल्याण्ड थ्यंम्ह व्यक्ति धकाः सत्यमोहन जोशीयात धायेगु याना वयाच्वनागु खःसां वृत्तचित्र स्वयेधुंकाः व असत्य जूगु धासें आः उकियात संशोधन यायेमाःगु विचाः तयादिल ।

वृत्तचित्र निर्माण समितिया नायः डा. राजकर्णिकारं वृत्तचित्र निर्माण यायेगु विचाः व पे्ररणाया स्रोत मदुम्ह नेवाः न्ह्यलुवा पद्मरत्न तुलाधर जूगु जानकारी बियादिल । मदुम्ह नेवाः न्ह्यलुवा तुलाधरं झीगु ख्यःया विशिष्ट व्यक्तिपिंसं याना वयाच्वंगु ज्याखँ अभिलेखीकरण यानाः लिपाया पुस्तायापिंत सीके बीमाः धयादीगुलिं हे थुगु वृत्तचित्र निर्माणया ज्या न्ह्याःगु जानकारी बियादिल ।

वृत्तचित्र निर्माण समितिया न्वकु शाक्य सुरेनं लसकुस यानादीगु ज्याझ्वलय् विजयरत्न असंबरें नं नुगःखँ तयादीगु खःसा समितिया छ्याञ्जे राजेन मानन्धरं सुभाय् देछानादीगु खः ।

आपालं साहित्यकार व भाषा ह्यमिपिनिगु उपस्थिति दुगु ज्याझ्वलय् सत्यमोहन जोशीया वृत्तचित्र १० गू विषयय् १३घौ ताःहाकःगु जानकारी नं बिउगु खः ।

सम्बन्धित बुखँ

LEAVE YOUR COMMENTS