हानं शुरु जुल नगर प्रहरी आतंक !
येँ (नेपालभाषा टाइम्स)- येँया लुँहितिइ च्वंगु काठमाडौं मलया अण्डर ग्राउण्ड तलाय् तयातःगु पार्किङ चायेकः वंपिं येँ मनपाया नगर प्रहरी व अन पसः दुपिं व्यवसायीतय् दथुइ ताःहाकः विवाद जूगु दु । महानगरपालिकां मलया न्हापांगु तला खाली यायेत निर्देशन बिसें म्हिगः माइकिङ याःगु खःसा उकिया विरोधय् व्यवसायीतय्सं नाराबाजी याःगु खः ।
कर्मचारी सञ्चय कोषं सञ्चालन याना वयाच्वंगु मलया भुइँ तलाय् पार्किङया निंतिं थाय् दयेकेमाः धकाः महानगरं ताकेता याना वयाच्वंगु खः । थुकिया विरुद्ध मलं तःगु रिटयात कयाः वंगु पुस २६ गते तिनि उच्च अदालत यलया इजलासं अल्पकालीन अन्तरिम आदेश बिया हःगु खः । उगु आदेश कायम हे जुयाच्वंगु इलय् मनपाया नगर प्रहरी वयाः मलया भुइँ तला खाली याकः वःगुलिं व्यवसायीत आक्रोशित जूगु खः ।
थ्वहे झ्वलय् म्हिगः येँ महानगरपालिकाया ज्याकू न्ह्यःने फुटपाथ व्यापारीतय्सं नं प्रदर्शन याःगु दु । मनपाया प्रहरीं फुटपाथ व्यवसायीया ठेलगाडा, साइकल, डोको लगायत सामान जफत यायेवं पीडित जूपिं व्यवसायीतय्सं काठमाडौं प्लाजा न्ह्यःने च्वनाः प्रदर्शन याःगु खः ।
येँ मनपां वंगु आइतवाः बहनी थाय्थासय् चाःहिलाः फुटपाथय् पसः तयाच्वंपिं झिंन्यागू स्वयां अप्वः ठेलागाडा सहित थीथी सामान जफत याःगु खः । उगु हे खँयात कयाः म्हिगः व्यवसायीतय्सं प्रदर्शन याःगु खः । मनपां थीथी थासय् यानाः ३८ गू ठेलागाडा व ३९ गू साइकल जफत यायेधुंकूगु दु ।
आन्दोलन यानाच्वंम्ह फुटपाथ पसल्या कुमार सापकोटां नगर प्रहरीं लुटे यायेगु पहलं फुटपाथ व्यवसायीया सामान जफत याःगुलिं आन्दोलनय् कुहां वयेमाःगु खँ धाःगु दु । लिसें मनपां सामाज जफत यायेगु झ्वलय् गुलिखे व्यवसायीया तिसा व वसः समेत तंगु खँ नं सापकोटां कनादीगु दु ।
ईलिसे याःगु सम्झौता कार्यान्वयन यायेत दयेकूगु कार्यदलया दुजः समेत जुयाच्वंम्ह सापकोटां आः नगर प्रहरीया ज्यादती विरुद्ध निरन्तर हे आन्दोलन यायेगु तयारी जुयाच्वंगु खँ नं कनादीगु दु ।
LEAVE YOUR COMMENTS