शनिवाः संक्रमितत ५७ म्ह

येँ (नेपालभाषा टाइम्स) – म्हिगः शनिवाः न्हिछिया दुने नेपाःया न्यंकं मुक्कं ५७ म्हेसिके कोरोना संक्रमण पुष्टि जूगु दु। नेपालय् कोरोना संक्रमिततय् ल्याः अप्वया वंगु जेठया मध्य लिपा संक्रमितत दकलय् म्हो खनेदुगु म्हिगः हे खः ।

वंगु असार १९ गते नेपालय् दकलय् अप्वः ७४० म्हेसिके कोरोना संक्रमण खनेदुगु खः । न्हियान्हिथं निसः स्वसलं अप्वः कोरोना संक्रमितत खने दया वयाच्वंगु अवस्थाय् वंगु वालं निसें संक्रमिततय् ल्याः न्यून खनेदया वःगु खः । वंगु शुक्रवाः १०१ म्हेसिके संक्रमण जूगु खनेदुगु खःसा छवाः न्ह्यवया शुक्रवाः ७० म्हेसिके व शनिवाः ८२ म्हेसिके संक्रमण खनेदुगु खः ।

संक्रमिततय् ल्याः म्हो जूसां परीक्षण हे म्हो जूगु कारणं जक थ्व ल्याः म्हो जूगु विज्ञतय्सं धाःगु दु। सरकारं नं परीक्षण संख्या म्हो जूगु खँ धाःगु दु। स्वास्थ्य मन्त्रालयं म्हिगः याःगु नियमित अपडेटय् भारतं लिहां वःपिं म्हो जूगु व परीक्षण ल्याः म्हो जूगुलिं संक्रमितत नं म्हो जूगु खँ धाःगु खः ।