जनयुद्ध सम्बन्धी गतिविधिया संग्रहालय चायेकीगु

येँ – देशय् जूगु झिदँ ताःहाकःगु जनयुद्धयात कयाः संग्रहालय स्थापना याइगु जूगु दु । सांस्कृतिक संग्रहालय नेपालं देशय् जूगु झिदँया सशस्त्र द्वन्द्वयात कःघानाः ‘जनयुद्ध संग्रहालय’ स्थापना यायेत्यंगु खः । तत्कालीन नेपाल कम्युनिष्ट पार्टी (माओवादीं) याःगु सशस्त्र द्वन्द्वया इलय् जूगु थीथी गतिविधियात दुथ्याकाः सांस्कृतिक संग्रहालय नेपालं उकथंया संग्रहालय स्थापना यायेत्यंगु खः ।

संग्रहालयया संयोजक क्षितिज अरुण श्रेष्ठया कथं माओवादीया सशस्त्र द्वन्द्व सम्बन्धी अध्ययन व अनुसन्धान नापं जनयुद्ध शुरु जूगु इलंनिसें नेपाल सरकारलिसे जूगु विस्तृत शान्ति सम्झौताया अवधितकया दुने जूगु थीथी घटनाक्रम, ऐतिहासिक किपा, दस्तावेज व जानकारी दुथ्याकाः संग्रहालय स्थापना यायेत्यंगु खः ।

नेपाल कम्युनिष्ट पार्टी (नेकपा)या अध्यक्ष पुष्पकमल दाहाल ‘प्रचण्ड’यात हे संरक्षक दयेकाः चायेकेत्यंगु संग्रहालयं देशय् जूगु झिदँ ताःहाकःगु शसस्त्र द्वन्द्वःया इलय् जूगु ऐतिहासिक घटनाक्रमया बारे थौंया न्हूगु पुस्तायात जानकारी बीगु उद्देश्यं उकथंया संग्रहालय आवश्यक जूगु अध्यक्ष श्रेष्ठं कनादिल ।

विश्वय् नं उकथंया द्वन्द्वया संग्रहालय निर्माण जूगु इतिहास दुगुलिं नेपालय् नं द्वन्द्वकालीन ईया थीथी गतिविधि बारे जानकारी बीगु ल्याखं चायेकेगु संग्रहाल रोल्पा वा चितवनय् तइगु जूगु दु । ‘विदेशीतय्त नं नेपाःया जनयुद्धनिसें शान्ति प्रक्रियातकया बारे अध्ययन अनुसन्धानय् ग्वाहालि यायेगु ल्याखं संग्रहालय स्थापना यायेत्यनागु खः’ अध्यक्ष श्रेष्ठं धयादिल, ‘नेपाःया जनयुद्धया अवतरण विश्वयात हे अजू चायेका बीकथंया दु ।’

रोल्पा व चितवनय् जनयुद्ध संग्रहालय स्थापना यायेगु निंतिं खँ जुयाच्वंगु धासें अध्यक्ष श्रेष्ठं गन च्वंपिं स्थानीयतय्सं जग्गा उपलब्ध याकल संग्रहालय नं अन हे चायेकेगु जुइ । संग्रहालयया निंतिं आवश्यक ५५०० किसिमया किपा, २५० श्रव्य व श्रव्यदृश्य संकलन नं जुइधुंकूगु दु । संग्रहालय स्थापना यायेगु उद्देश्यं हे संस्थां दँय्दसं फागुन १ गते कुन्हु किपा ब्वज्या तकं याना वयाच्वंगु दु ।

थ्व झ्वलय् संग्रहालय स्थापनया निंतिं माओवादी सशस्त्र द्वन्द्वया विशेष लुमन्तिकथं ‘माओवादी जनयुद्धया निगू दशक’ नामं ऐतिहासिक किपा ब्वज्या तकं जुइधुंकूगु दु । संग्रहालयया निंतिं राज्य व तत्कालीन नेकपा (माओवादी) दथुइ जूगु सशस्त्र हिंसात्मक गतिविधि, हिंसा, हिंसा सम्बन्धी किपा धाःसा मतइगु जूगु दु ।

संग्रहालयया निंतिं हे धकाः १६ गू थान सैनिक पोशाकतकं संकलन यानातःगु दु । करिब न्हय्गू करोड तका लागतय् निर्माण जुइगु संग्रहालय आकिवं तकया दुने संचालनय् हयेगु कथंया तयारी जुयाच्वंगु संग्रहालयया सचिव आस्था केसीं जानकारी बियादिल ।

सम्बन्धित बुखँ

LEAVE YOUR COMMENTS