महानगर दिवसय् छवाःयंकं ज्याझ्वः

येँ(नेपालभाषा टाइम्स)-येँ महानगर पालिकां महानगर दिवसया तयारी न्ह्याकूगु दु । येँ महानगरपालिकां दँय्दसं मंसिर २९ गतेयात महानगर दिवसया रुपय् हना वयाच्वंगु दु । थ्व झ्वलय् थुगुसी हनेत्यंगु महानगर दिवस २८ क्वःगु खः ।

थुगुसी महानगरपालिकां छवाःयंकं थीथी ज्याझ्वः यासें महानगर दिवस हनेत्यंगु दु । महानगर दिवसया तयारीया निंतिं येँ महानगरपालिकाया प्रमुख लिसें महानगर दिवस मूल समारोह समितिया संयोजक बालेन्द्र शाह (बालेन)या अध्यक्षताय् च्वंगु मुँज्याय् थीथी उपसमितिपाखें ज्याझ्वःत न्ह्यब्वःगु खः ।

प्रस्तावित ज्याझ्वःकथं अनलाइन सेवाग्राही सर्वेक्षण यायेगु नापं सार्वजनिक स्थल, सरकारी व सार्वजनिक ज्याकू, सम्पदा क्षेत्र, वडा ज्याकूलिसें खुसिया सुचुकुचु यायेगु लगायतया ज्याझ्वःत तयातःगु दु । अथे हे मेयर ११ व प्रमुख प्रशासकीय अधिकृत ११ दथुइ मैत्रीपूर्ण फुटबल कासा, मिसा कर्मचारी व मिसा जनप्रतिनिधि दथुइ कुर्सी दौड, विद्यालयस्तरीय चित्रकला, निबन्ध प्रतियोगिता व शिक्षकस्तरीय न्ह्यसः लिसः कासा यायेगु ज्याझ्वः नं तयातःगु दु ।

थुकथं हे परम्परागत वाद्यवादय् ल्याय्म्ह पुस्तायात प्रोत्साहित यायेगु ल्याखं धिमे बाजं कासा, सम्पदा यात्राया अनुभवयात भिडियो प्रदर्शनय्नापं सम्पदा मार्गय् थीथी रचनात्मक ज्याझ्वः यायेगु नं प्रस्ताव याःगु दु । थ्व बाहेकं थुगुसी महानगरया प्रतिष्ठा व गौरवलिसे स्वानाच्वंगु किपा व चित्रया प्रतियोगितात्मक प्रदर्शनी नं याइगु जूगु दु ।
मेखे न्हापांनिसें याना वयाच्वंगु परम्परागत बाजं गुरुया सम्मान, महानगरया न्हापांम्ह प्रमुख जनकमान श्रेष्ठया नामं स्वनातःगु जनकमान श्रेष्ठ सुशासन सिरपाः, स्थानीय सेवा गौरव पदक वितरण, उत्कृष्ट करदाता, कर्मचारी सम्मानलिसें सुशासन पत्रकारिता पुरस्कार वितरणया ज्याझ्वः नं तयातःगु दु ।

महानगर दिवस सुथां लाकेत बैठकं थीथी उपसमिति नं नीस्वंगु खः । महानगरया प्रवक्तालिसें १७ वडाअध्यक्ष नविन मानन्धरया संयोजकत्वय् जनप्रतिनिधि, पत्रकार व समाजया लब्ध प्रतिष्ठित व्यक्ति सम्मान नापं पुरस्कार छनौट उपसमिति, प्रचार प्रसार एवं प्रतिवेदन उपसमिति र कार्यक्रम सञ्चालन एवं व्यवस्थापन यानाः स्वंगू उपसमिति गठन याःगु दु ।

अथे हे प्रमुख प्रशासकीय अधिकृत वसन्त अधिकारीया संयोजकत्वय् कर्मचारी पुरस्कार व सम्मान उपसमिति, ८ वडाअध्यक्ष आशामान संगतया संयोजकत्वय् सांस्कृतिक तथा सम्पदा उपसमिति, १० वडाअध्यक्ष रामकुमार केसीया संयोजकत्वय् कासा व इभेन्ट संचालन, ११ वडाअध्यक्ष हिरालाल तण्डुकारया संयोजकत्वय् अतिथि सत्कार व निमन्त्रणा उपसमिति, १२ वडाअध्यक्ष बालकृष्ण डंगोलया संयोजकत्वय् सरसफाइ व साजसज्जा, १६ वडाअध्यक्ष मुकुन्द रिजालया संयोजकत्वय् राजस्व पुरस्कार व सम्मान, ३० वडाअध्यक्ष दलबहादुर कार्कीया संयोजकत्वय् स्वास्थ्योपचार उपसमिति गठन याःगु खः ।

महानगर दिवसय् महानगरवासीया सहभागिता अप्वयकेत थीथी थासय् थीथी ज्याझ्वः नं संचालन याइगु जूगु दु ।

सम्बन्धित बुखँ

LEAVE YOUR COMMENTS