‘झापा टी स्टेटया जग्गा नं छानबिन जुइ’

येँ (नेपालभाषा टाइम्स)- प्रधान मन्त्री पुष्पकमल दाहालं झापाया गिरीबन्धु टि स्टेट्सया जग्गा प्रकरणय् नं अनुसन्धान जुइगु खँ धयादीगु दु । सम्पादकतलिसे येँय् याःगु सहलहया झ्वलय् ललिता निवास प्रकरण व भुटानी शरणार्थी प्रकरणय् थें यानाः गिरीबन्धु टि स्टेट्सया जग्गा प्रकरणय् बुलुहुँ छानबिन जुइगु खँ धयादीगु खः ।

तत्कालीन केपी ओली नेतृत्वया सरकारं झापा बिर्तामोडस्थित गिरीबन्धु टि स्टेट्सया नामय् दुगु ३४२ विघा १९ कठ्ठा १२ धुर जग्गा सट्टाभर्ना याके बीगु नितिं भूमि सम्बन्धी ऐनय् च्याक्वःगु संशोधन याःगु खः । टि स्टेट्सया थिकेगु जग्गा मीगु निंतिं उगु कानुन संशोधन याःगु द्वपं एमाले अध्यक्ष केपी शर्मा ओलीयात बीगु यानाच्वंगु दु ।

प्रधानमन्त्री दाहालं सुशासन, सामाजिक न्याय व समृद्धियात प्राथमिकता बियाः ज्या यानाच्वनागु धासें भ्रष्टाचार व सुशासनयात प्राथमिकता बीगु झ्वलय् नक्कली शरणार्थी व ललिता निवास प्रकरण नं लँय् लूगु व उकी नं अः सरकारं ज्या यानाच्वंगु खँ धयादीगु दु ।

उकथं हे प्रधानमन्त्री दाहालं ९ किलो लुँ तस्करी सम्बन्धी प्रकरणय् स्वाःम्ह माओवादी केन्द्रया उपाध्यक्ष कृष्णबहादुर महरा बारे नं प्रहरीं याकनं निर्णय याइगु खँ कनादिल ।

पत्रकारतलिसे खँ ल्हायेगु झ्वलय् प्रम दाहालं धयादिल, ‘जिं महराजीयात नं सःताः थुगु प्रकरणय् छिगु खँ छु खः क्लियर या धकाः धयागु दु । उकथं हे प्रहरीया नेतृत्वयात नं निष्पक्ष छानविन यानादिसँ, दोषी सुं हे त्वःमफीमा, निर्दोष सुं हे मलायेमा धयागु दु ।’

‘लुँ तस्करी प्रकरणय् जिं प्रहरीयात महराजीया संलग्नता दुसा अनुसन्धान यायेमाः, मुद्दा न्ह्याकेमाः धया, दोषी मखुसा आम नागरिकयात व खँ धया बीमाः’ वय्कलं धयादिल ।