न्यतभलु अजिमाया प्याखं हुहुं प्याखंम्वः मंत

येँ (नेपालभाषा टाइम्स)-न्यतभलु अजिमा (श्वेतकाली) या झिंनिदँ जात्राया झ्वलय् यलया कात्ति दबुलिइ प्याखं हुलाच्वँच्वं हे द्यः गणया प्याखंम्वः रामकाजी महर्जन मंत । वंगु विहिवाः अष्टमि कुन्हु यलया कात्ति दबुलिइ न्यतभलु अजिमाया प्याखं हुइकूगु खः । प्याखं हुलाच्वँच्वं हे उकी भैरव जुयाः प्याखं हुलादीम्ह महर्जनयात हृदयाघात जूगु खः । वयां तुरुन्त लिपा वय्कःयात अस्पताल यंकूगु खःसा अन वय्कः मदुगु घोषणा जूगु खः ।

वय्कः ६२ दँ दुम्ह खः । मदुम्ह महर्जनया अन्तिम संस्कार म्हीग यायेधुंकूगु दु । वय्कःया जहान लिसें काय छम्ह व म्ह्याय् प्यम्ह दी । वय्कः गुथिया थाकुलि मध्ये छम्ह खः ।
कात्ति दबुलिइ वकुन्हु हे प्याखं हुलाच्वंम्ह धर्म महर्जनयात नं तुतिइ ला थहां वनाः अस्पताल भर्ना यायेमाःगु खः । व्याघ्रिणी जुयाः प्याखं हुलीम्ह वय्कःया उसाँय् धाःसा आः बांलाना वःगु खँ धाःगु दु ।

भैरव जुयादीम्ह प्याखंम्वः मदयेवं वय्कःया थासय् मेम्ह प्याखंम्वः तयाः प्याखं हुइके धुंकूगु दु । थ्व प्याखंया गुथिइ १४ म्ह मोहनि सिन्हः तिनातःपिं दुजःत दइ । आवश्यक जुइपिं प्याखंम्वःत थ्वहे १४ म्ह दुनें कायेगु याइ । भैरव जुइम्ह प्याखंम्वः मंत धाःसा वय्कः काय हे भैरव जुइमाःगु परम्परा दुसां थुुगुसी जात्रा हे जुयाच्वंगु जुयाः थुकिया बारे लिपा निर्णय जुइगु खँ धाःगु दु । भाजु महर्जन मदुगुलिं गुथियात तःधंगु क्षति जूगु खँ धाःगु दु ।