अमेरिकाय् न्हापांखुसी अष्टमि व्रत ज्याझ्वः
येँ (नेपालभाषा टाइम्स)- नेपालं पिने न्हापांखुसी अमोघपाशलोकेश्वर उपोषधव्रत साधना (अष्टमी व्रत) च्वनेगु ज्या जूगु दु । अमेरिकाया वासिंगटन डिसी मेट्रोपोलिटिन लागाय् ‘अमेरिका–नेपाल परम्परागत बौद्ध धर्म संघ’ या ग्वसालय् करुणामय अमोघपाश लोकेश्वरया अष्टाङ्ग उपोषधव्रत च्वनेगु ज्या जूगु खः ।
थुगु अष्टमी व्रत ने.सं. ११४३ कछलाथ्व कार्तिक शुक्लपक्ष अष्टमीनिसें शुरु जुयाः झिंनिला (१२ महिना) तक न्ह्याकाःलि वंगु ने.सं. ११४४ कछलाथ्व कार्तिक शुक्लपक्ष कुन्हु क्वचायेकूगु खः । थुगु व्रतया निंतिं प्रा.डा. नरेशमान बज्राचार्य गुरुया निर्देशनय् ‘अमेरिका–नेपाल परम्परागत बौद्ध धर्म संघ’या न्हापांम्ह न्वकु गुरु यज्ञमान शाक्यपाखें
न्ह्याकेगु ज्या जूगु खः ।
नेपाः देय्या झिंनिगू तिर्थ वा झिंनिम्ह करुणामयया आधारय् झिंनिला तक जूगु थुगु उपोषधव्रत, अष्टमी कुन्हु याइगु जुयाः थुकियात‘अष्टमी व्रत’ धायेगु चलन दु । थुगु व्रतय् अमेरिकाया डिसी महानगर लागाय् च्वंपिं व्रतालु नापं थीथी इलय् नेपालंनिसें वयाः च्वनादीपिंसं ब्वति कयादीगु खः । थुगु उपोषधव्रत धलं दनीकुन्हु सकल धलंमुपिंत गुरुमण्डल दंकाः काय, वाक, चित्तयात शुद्ध यानाः त्रि–शरण गमन वनाः चीभाःद्यः थाकाः पुजा याकी ।अनंलि बुद्ध धर्म संघयात पुजा यानाः शरण वने धुनाःलि थःथःगु करुणामयया मन्दः भक्तिभावं पुजा यानाः करुणामयया गुण थुइकुसें थःपिंके नं करुणामयया थें गुण दयेमा धकाः भक्तिभावं पुजा याइ ।
वयां लिपा जगतय् दुपिं सकल सत्व प्राणीया हित जुइगु ज्या याये फयेमा धकाः बोधिचित्त उत्पन्न यानाः व्रत काःयात पुजा यासें अर्घदान याःगु खः । थ्व धुंकाः गुरुपाखें कनाबिज्याःगु दशांकुशल पापयात त्वःतेमाल धयागु खँ, अष्टशीलय् च्वनाः एकचित्तयासे थुगु श्री अमोघपाश लोकेश्वरया अष्टाङ्ग उपोषधव्रत दनेमाः धकाः बाखं कनेगु ज्या ज्या जूगु खः ।
LEAVE YOUR COMMENTS