थौं धाथेंया सछिदँय् कोष घोषणा

नेपालभाषा टाइम्स

येँ – वाङ्मय शताब्दी पुरुष सत्यमोहन जोशीया धाथेंया सछिदँ बुन्हि थौं हनेत्यंगु दु । नेवाः परम्पराकथं तिथिं हनीगु
य्कःया जन्मन्हि थौं खः । थ्व लसताय् थौं येँय् जुइगु छगू ज्याझ्वःया दथुइ वय्कःया नामं कोष घोषणा यायेगु तयारी जुयाच्वंगु दु ।
विक्रम संवत् कथं धाःसा वंगु वैशाख ३० गते यल महानगरपालिकां तःजिक ज्याझ्वः यासें वय्कःया सछिदँ बुन्हि हनेधुंकूगु दु । समाजसेवी लक्ष्मीदास मानन्धरया संयोजकत्वय् नीस्वंगु पुचलं थौं वय्कःयात सछिदँ क्यंगु लसताय् भिंतुना देछासें उगु कोषया नं घोषणा यायेत्यंगु खः । थ्व कोष विशेष यानाः मस्तय्त मांभाय् व नेवाः संस्कृतिपाखे आकर्षित यायेगु ज्याय् छ्यलेगु कथं दयेकेत्यंगु खः ।

कोष याइगु ज्याझ्वलय् थ्व कोषपाखें याइगु न्हापांगु ज्याया नं घोषणा जुइगु खँ सीदुगु दु । भाजु जोशीया हे इच्छा कथं कोषं लिपा तकं सञ्चालन याये फयेक आय आर्जन समेत जुइ फइगु ज्याझ्वः याना वनीगु खँ धाःगु दु ।
थौं हे वय्कःया सछिदँ बुन्हिया लसताय् लोकसाहित्य परिषदं वय्कःयात नेवाः परम्पराकथं ख्येँ सगं बीगु नं ज्याझ्वः दयेकातःगु दु । वय्कःया बुन्हिया लसताय् छेँपाखें नं थौं हे वय्कःया सगं बियाः पुजा याइगु खँ सीदुगु दु ।