लिटिल स्टार नेपालभाषा म्येँ कासा क्वचाल
यल(नेपालभाषा टाइम्स)÷यल महानगरपालिका १६ वडा कलाकार समितिया ग्वसालय् यँयाः नखःया लसताय् जूगु लिटिल स्टार नेपालभाषा म्येँ धेंधेंबल्लाः कासा क्वचाःगु दु ।
कासाय् अमला महर्जनं न्हाप सिरपाः त्याकेत ताःलाःगु दु । न्हाप सिरपाः त्याकादीम्ह महर्जन छगू लख तकालिसें दकलय् बांलाःम्ह म्येँ हालामिकथं नीन्याद्वः तका दां नं सिरपाः त्याकादीगु दु ।
अमला महर्जनं हालादीगु म्येँ लसय् हनादीम्ह नांजाःम्ह म्येँ हालामि सानुबाबु महर्जनं दकलय् बांलाःम्ह संगीतकार व प्रविण लाखाजुं दकलय् बांलाःम्ह म्येँ च्वमिया सिरपाः त्याकेत ताःलाःगु दु । वय्कःपिं निम्हेसिनं म्हतिं नीन्याद्वः तका सिरपाः त्याकादीगु खः ।
अथे हे म्ये कासाय् लिउ लाःम्ह कुञ्जनी महर्जनं न्हय्न्याद्वः, लियांलिउ लाःम्ह युनिशा शेर्पा देसारं न्यय्द्वः व पुष्पराज शाक्यं हःपाः सिरपाःकथं नीन्याद्वः तका दां त्याकेत ताःलाःगु दु ।
वंगु विहीवाः थनया लाय्कूस्थित पाटन म्युजियमया भन्दाः क्यबय् जूगु म्येँ कासाय् दीप श्रेष्ठ, जुगल डंगोल, संगीता शाक्य, नर्सिङलाल श्रेष्ठ व इन्द्र व्यञ्जनकार निर्णायककथं च्वनादीगु खः ।
ज्याझ्वलय् मूपाहांकथं झायादीम्ह बागमति प्रदेशया उद्योग मन्त्री रामकृष्ण चित्रकार व विशेष पाहां मदनकृष्ण श्रेष्ठं सिरपाः लःल्हानादीगु खः ।
LEAVE YOUR COMMENTS