भाषाया विकल्पय् भाषा हे तयेत इनाप

येँ (नेपालभाषा टाइम्स)- स्कुल तगिंया शिक्षाय् कक्षा ९ व १० य् ऐच्छिक विषयकथं अनिवार्य रुपं न्ह्यागुसां छगू भाषा ब्वने दइगु व्यवस्था यायेत नेपालभाषाया अभियन्तातय्सं शिक्षा मन्त्री समक्ष इनाप याःगु दु ।

नेवाः न्ह्यलुवा लिसें पुलांम्ह मन्त्री राजेन्द्र श्रेष्ठ समेत दुथ्याःगु भाषिक अभियन्तातय्गु छगू पुचलं आः नकतिनि शिक्षा मन्त्री अशोक राईयात नापलानाः थौंकन्हय् कक्षा ९ व १० य् ऐच्छिक विषय कथं यदि भाषा ब्वनेगु इच्छा यात धाःसा विज्ञान, अतिरिक्त गणित वा कम्प्युटर साइन्स ब्वने मदइ कथं यानातःगु व्यवस्था संशोधन यायेत इनाप याःगु खः ।

९ व १० तगिमय् नेपालभाषा लगायत थीथी भाषा ब्वने दइ कथं व्यवस्था यानातःगु दुसां भाषा विषय छनौट यात धाःसा विज्ञान, गणित, कम्प्युटर विषय ब्वने मखनीगु जूगुलिं भाषा ब्वनेगु इच्छा याःसां ब्वने खनाच्वंगु मदु । उकिं ऐच्छिक विषयय् भाषाया विकल्पय् भाषा हे तयेगु कथं पाठ्यक्रम मिले यायेत इनाप याःगु खः ।

भाषा ब्वन धाःसा विज्ञान–गणित विषय ब्वने मखनीगु थ्व व्यवस्था पञ्चायतकालय् हे यानातःगु खःसा नेपालभाषा अभियन्तातय्सं प्रजातन्त्र व गणतन्त्र वयेधुंकाः हरेक धइथें शिक्षा मन्त्रीतय्त थुकी संशोधन याये माल धकाः इनाप याना वयाच्वंगु दु ।