फोनिज बागमतिया न्याक्वःगु प्रादेशिक भेला

येँ(नेपालभाषा टाइम्स)- नेपाल आदिवासी जनजाति पत्रकार महासंघ (फोनिज) बागमति प्रदेश (नेवाः–ताम्सालिङ) या न्याक्वःगु प्रादेशिक भेला चितवनय् क्वचाल । चितवनया राप्ती नगरपालिकास्थित कृषि विकास तालिम केन्द्रय् उगु प्रादेशिक भेला जूगु खः ।

‘पहिचान व अधिकारया निंतिं समावेशी संचार ऐन कानून निर्माण, संविधान कार्यान्वयनया आधार’ धइगु नारा बियाः ग्वसाः ग्वःगु निन्हुयंंकंया भेलां थ्व हे फागुन २७ व २८ गते सर्लाहीइ जू वनाच्वंगु फोनिजया विधान अधिवेशनया निंतिं सुझावत पेश यायेगु निर्णय याःगु दु । अथे हे भेलां सकल आदिवासी जनजाति पत्रकारतय् क्षमता अभिवृद्धिया निंतिं प्रदेशया दक्वं जिल्लाय् ‘बागमति फानिज जागरण’ अभियानया रुपय् प्रशिक्षण तालिम संचालन यायेगु नं निर्णय याःगु दु ।

राप्ती नगरपालिकाया प्रमुख शमशेर लामाया प्रमुख आतिथ्यताय् जूगु भेलाय् विशेष पाहांकथं उपप्रमुख देवेन लामा, फोनिजया संघीय सचिव समिर बलामी, संघीय सदस्यलिसें बागमति प्रदेश इन्चार्ज पेमा लामा, राप्ती नगरपालिका ५ वडाअध्यक्ष सितारा बल तामाङ, नेपाल तामाङ घेदुङया संघीय सचिव गोपाल सिंह लामा, फोनिज बागमति प्रदेशया सल्लाहकार कृष्ण सारु मगर, नेपाल आदिवासी जनजाति महासंघ चितवन जिल्ला अध्यक्ष महेन्द्र दुरा, थारु पत्रकार संघ चितवनया अध्यक्ष दिपेश थारु, तामाङ पत्रकार संघ चितवन शाखा सचिव प्रकाश तामाङ, समाजवादी पे्रस संगठनया कोषाध्यक्ष बबिलाल तामाङपिनिगु उपस्थिति दुगु खः ।

फोनिज जिल्ला शाखा दोलखाया पुलांम्ह दुजः शेरबहादुर भुजेल मत्यवं मदुगुलिं दुःख प्वंकसे शोक प्रस्ताव नं पारित याःगु दुसा भेलां १३ गू बुँदाया राप्ती घोषणापत्र नं जारी याःगु दु ।