श्री अशोक विनायक गुथिया क्वःगु दँमुँज्या

येँ – श्री अशोक विनायक गुथिया क्वःगु दँमुँज्या क्वचाःगु दु। गुथिया नायः तीर्थमान महर्जनया सभापतित्वय् जूगु दँमुँज्यां गुथिया न्हूगु ज्यासना पुचःया नं ल्यज्या याःगु खः ।

येँ महानगरपालिका वडा नं. २० या वडाअध्यक्ष राजेन्द्र मानन्धर मूपाहांकथं यादीगु खःसा ज्यापु महागुथि नेपाः येँ महानगर समितिया न्वकु ज्ञानीबाबु सिंह, ज्यापु संस्कृति विकास कोषया न्वकु सन्तकुमार महर्जन, मरु गणेद्यःया दाता साहु खलःया थाकुलि प्रल्हादकृष्ण मानन्धर, गुथिया न्याम्ह थाकुलिपिं हर्षवीर महर्जन, पूर्णनारायण महर्जन, सतुभाई महर्जन, रामदास सिं, मचाम महर्जन पाहांकथं यादीगु खः ।

छ्यांजे जोगमान महर्जनं लसकुस यासें गुथिया विधान संशोधन यायेमाःगु आवश्यकता व गुथिया गतिविधि बारे जानकारी बियादीगु खःसा दांभरिं हिराकाजी डंगोलं वंगु आर्थिक दँया ल्याःचाः न्ह्यब्वयादीगु खः । मूपाहां वडाअध्यक्ष राजेन्द्र मानन्धर, पाहां ज्ञानीबाबु व सन्तकुमारं नुगःखँ प्वंकादीगु ज्याझ्वलय् गुथिया नायः महर्जनं थःगु खुदँया कार्यकालय् यानागु ज्याया जानकारी बियादीगु खः ।

न्हूगु ज्यासना पुचलय् तीर्थमान महर्जन नायः, हिराकाजी महर्जन न्वकु, जोगमान महर्जन छ्यांजे, हिराकाजी महर्जन दांभरिंलय् व मू दुजलय् रुपनारायण महर्जन, शिव महर्जन, ज्ञानकाजी महर्जन, तुयु महर्जन, हिराकाजी महर्जन, मोहननारायण महर्जन निर्विरोध निर्वाचित जुयादीगु दुसा सूर्यमान महर्जनयात दुजलय् मनोनित याःगु खः । पुष्पकृष्ण डंगोल निर्वाचन अधिकृत, दीर्घनारायण महर्जन, राजेन्द्र महर्जन दुजः जुयादीगु निर्वाचन कमिटीं न्हूगु ज्यासना पुचलय् निर्वाचित जुयादीपिनिगु नां घोषणा याःगु खः ।