मन्त्री विरुद्ध हिन्दूतय् प्रदर्शन
येँ (नेपालभाषा टाइम्स)-संस्कृति मन्त्री सुदन किरातीं इसाइ धर्मया बारे न्ववानादीगु खँयात कयाः हिन्दू राष्ट्र–वादीतय्सं विरोध प्रदर्शन याना हःगु दु । वय्कलं इसाई धर्म माने याये मखु धाइपिं संविधान विरोधी खः धासें अज्याःपिंत ज्वनाः कारवाही यायेमाः धयादीगु खँयात विरोध यासें हिन्दू कट्टरपन्थीतय्सं प्रदर्शन याःगु खः ।
म्हिगः गौशालाया पशुपति लागाय् राप्रपा समर्थित हिन्दूवादी संस्थातय्सं मन्त्री किराती विरुद्ध प्रदर्शन याःगु खः । उमिसं मन्त्री किरातीयात बर्खास्त यायेमाः धासें वय्कः विरुद्ध नाराबाजी समेत याःगु खः ।
मन्त्री किरातीं म्हीग तिनि पशुपति विकास कोषया कार्यकारी अध्यक्ष पदय् लक्ष्मी पुनयात नियुक्त याःगु खँय् नं हिन्दूवादीतय्सं विरोध याःगु खः । पशुपति विकासय् गैरु ब्रम्हूयात कार्यकारी पदय् हल धासें उमिसं उकिया नं विरोध याःगु खः । पुनया नियुक्तिं यानाः तम्वयाच्वंपिं हिन्दूवादीत किरातीया थ्व अभिव्यक्ति वयेवं झन् हे तम्वःगु खः ।
हिन्दू कट्टरपन्थीतय्सं संविधानया धारा ४ य् सनातन धर्मयात राज्यं संरक्षण यायेमाः धकाः च्वयातःगु कारणं क्रिश्चियन धर्मया पालना यायेगु दायित्व राज्यया जुइ मखु धकाः नं दावी याना हःगु दु । उकिं क्रिश्चियन धर्मया संरक्षण यायेमाः धकाः धाल धाःसा व बरु संविधान विरोधी जुइ धकाः नं तर्क याना हःगु दु । क्रिश्चियन धर्मावलम्बीतय् तःधंगु नखः क्रिसमस न्ह्यःने थज्याःगु प्रदर्शन याना हःगुयात नं अर्थपूर्ण तायेकाहःगु दु ।
प्रदर्शन विरुद्ध जनजाति
संस्कृति मन्त्री सुदन किरातीया धापूयात विरोध यासें कट्टर हिन्दूवादीतय्सं याना हःगु प्रदर्शनयात कयाः जनजातितय्सं आक्रोश प्वंकाहःगु दु । थुमिसं किरातीया धापूयात मखु कथं व्याख्या याःगु धासें वय्कःया पूर्ण भाषण न्यनेत नं आग्रह याना हःगु दु । देशय् हिन्दू राष्ट्र व राजतन्त्र पुनस्र्थापना यायेमाः धकाः प्रतिगामी आन्दोलन यानाच्वंपिंसं किरातीया विरोध याना हःगु खः धासें थुकिया विरुद्ध किरात धर्म माने याइपिं नं छप्पँ जुइ माल धकाः सामाजिक सञ्जालय् आपालं जनजातितय्सं आह्वान याना हःगु दु । जुजुवादी व हिन्दू राष्ट्रवादीतय्सं मन्त्री किरातीया धापूयात गलत व्याख्या यानाः देशय् धार्मिक दंगा पिकायेत्यंगु द्वपं नं बियाहःगु दु ।
LEAVE YOUR COMMENTS