ने. सं. ११४४ ञलाथ्व दशमी -

हलिं नेवाः न्ह्यसः लिसः कासा शुरु

येँ- हलिं नेवाः दबू (वल्र्ड नेवाः अर्गनाइजेसन)या ग्वसालय् हलिं नेवाः न्ह्यसः लिसः कासा–११४१ शनिवाःनिसें शुरु जूगु दु । हलिं नेवाः दबू छगू दशक क्यंगु लसताय् थुगु न्ह्यसः लिसः कासा जूगु खः ।

वंगु शनिवाः दबूया नायः सिजन श्रेष्ठया सभापतित्वय् जूगु ज्याझ्वःया उलेज्या मूपाहां वाङ्मय शताब्दीपुरुष सत्यमोहन जोशीं त्वाःदेवाय् मत च्याकाः यानादीगु खः । कासाया उलेज्या यासें मूपाहां शताब्दीपुरुष जोशीं दबूपाखें छगू न्हूकथंया ज्याझ्वः ग्वसाः ग्वःगु अतिकं च्वछायेबहजू धासें विश्वन्यंकंया नेवाःतय्त छप्पँ छधी यायेगु ज्याय् नं ग्वाहालि जू वनीगु विश्वास प्वंकादिल ।

विशेष पाहां वरिष्ठ साहित्यकार हितकरवीर सिंह कसाःजुं न्यय्दँ न्ह्यसः ने.सं. १०९१ य् त्रिचन्द्र कलेजपाखें क्याम्पसस्तरय् व वयां दछि लिपा थानकोटया मंगलोदय माध्यमिक विद्यालयपाखें विद्यालयस्तरय् न्ह्यसः लिसः कासा शुरु जूगु खँ कनादिल । विद्यार्थी दथुइ जूगु न्ह्यसः लिसः कासा विचाः मयानाकथं व्यापकता कया यंकूगु व ०४६ सालया जनआन्दोलन लिपा न्ह्यसः लिसः कासा लिसें त्वाःत्वाःपतिकं न्ह्यानाच्वंगु साहित्य सम्मेलन नं दिउगु खँय् दुःख तायेकादिल ।

कासाया ब्यापकताया कारणं स्वइपिं नं अप्वःगुलिं सभागृह व प्रज्ञा भवन थेंज्याःगु थासय् तकं सेमीफाइनल व फाइनल कासा यायेमाःगु अवस्था वःगु जक मखसे अन जुइगु कासाय् नं सकसितं दुथ्याके मफुगु अनुभव कनादिल । प्रत्यक्ष जुइगु कासाय् थें भर्चुअलमाध्यमं जुइगु कासाय् उलि प्रभाव लाके मफइगु जूसां दबुलिइ आवद्ध जूपिं जक मखसे मेमेपिं नं ब्वति काये धइगु वातावरण ब्वलना वने फयेमा धइगु नं वय्कलं कामना यानादिल । ं

कासा ग्वसाः खलःया कजिलिसें दबूया ज्यासना पुचःया दुजः विमलमान श्रेष्ठं लसकुस यासें शनिवाःपतिकं नेपाःया ईकथं सनिलय् न्ह्याइगु थुगु कासा नोभेम्बर महिनातक मदिक्क न्ह्याइगु जानकारी बियादिल ।

न्ह्यसः निर्माण कमिटीया कजिलिसे साहित्यकार केशरमान ताम्राकारं सुभाय् देछानादीगु ज्याझ्वलय् सभानायः श्रेष्ठं हलिं नेवाः दबू पलिस्था जूगु छगू दशक क्यंगु दिं जूगुलिं विश्वया हरेक देशय् च्वंपिं नेवाःतय् निंतिं नं गर्व यायेबहगु दिं जूगु धासें गुगु उद्देश्यं दबू पलिस्था याःगु खः व बुलुहुं पूवंकेगु लँपुपाखे न्ह्याः वनाच्वंगु दु धयादिल ।

छगू पुचलय् स्वम्ह स्वम्ह कासामि दुथ्याकाः प्यंगू पुचः दुथ्याकाः ब्वति काःगु पुचःयात नेवाः पहः वयेक थीथी स्वांया नां बियातःगु दु । न्हापांगु न्हिया कासाय् भ्वंस्वां पुचः न्हाप, सिन्हःस्वां पुचः लिउ व उफ्वःस्वां पुचः लियांलिउ लाःगु खः । न्हाप, लिउ व लियांलिउ लाःगु पुचः मेगु चरणय् दुहां वंगु दु । न्हापांगु चरणया कासा प्यंगूगु थासय् लाःगु पुचःमध्ये दकलय् अप्वः ल्याः हयेत ताःलाःगु छगू पुचः नं मेगु चरणय् दुहां वनीगु ग्वसाः खलकं जानकारी बिउगु दु ।

नेपाःयालिसें अमेरिका, क्यानडा, बेलायत, आयरल्याण्ड लगायतया देय्या नीगू पुचलं ब्वति कयाच्वंगु कासाय् न्हापयात ६०० अमेरिकी डलर, लिउयात ४५० अमेरिकी डलर, लियांलिउयात ३०० अमेरिकी डलर व हःपाःकथं १५० अमेरिकी डलर सिरपाः व दसिपौ बी ।