दंक चा मिउगुलिं कुम्हाःतय् ल्वापु

ख्वप- खानीं पिहां वइगु हाकुगु चा अर्थात द्यःचा मीगु खँय् थन भारा छिनाः मीपिं कुम्हाःतय् दथुइ ल्वापु जूगु दु ।
वंगु वालय् झौखेलं डोजर छ्यलाः छम्ह बुँथुवालं थःगु बुं लिकया हःगु द्यःचा सुजःद्यः मरःत्वाः लागाय् हःगु खः । उगु चा न्हापा अन प्रति ट्रक च्याद्वः तकां मीगु खःसां उम्ह बुँथुवालं प्रति ट्रक खुद्वः तकां मीगु शुरु यायेवं भाः स्यंकः वल धकाः कुम्हाःतय् दथुइ ल्वापु जूगु खः ।
९ वडाया मंगलसुन्दर प्रजापतिं प्रति टिप खुद्वः तकां चा मियाच्वंगु खँ सीवं न्हापा च्याद्वःत्यां चा न्यानाच्वंपिं कुम्हाःत अजूचाःगु खः ।
उलि जक मखु चा ल्ह्यइम्ह ड्राइभरं अप्पा भट्टातय्सं ला थ्व चा छगू टिपया मुक्कं स्वद्वः तक जक कयाः मीगु खः धायेवं थिकयेक चा न्यानाच्वंपिं कुम्हाःत झन् हे चकित जूगु खः । उमिसं न्हापा च्याद्वः तकां चा मीपिंसं ला साह्रै अन्याः जुइक हे लबःनयाच्वंगु जुयाच्वन धकाः नं कुंखिना हःगु दु ।
च्याद्वः तकां चा मीपिं चा ब्यापारी कुम्हाःत धाःसा आः खुद्वः तकां चा मीम्ह मंगलसुन्दर प्रजापतिलिसे ल्वाः वनाच्वंगु खँ नं सीदुगु दु ।