कीर्तिपुर अस्पतालय् डाइलासिस सेवा सुरु

किपू- किपु नगर दुने हे डाइलासिस सेवा सुरु जूगु दु । म्हिगः छगू ज्याझ्वःया दथुइ किपू नगरपालिकाया मेयर रमेश महर्जन कीर्तिपुर अस्पतालय् चायेकूगु डाइलासिस सेवाया उलेज्या यानादीगु दु । उलेज्या लिपा दकलय् न्हापां डाइलासिस याका च्वनादीम्ह किपुया मय्जु सन्तु तण्डुकारलिसे खँल्हासें वय्कलं भिंउसाँयया कामना यानादिल । मय्जु तण्डुकारं थः थःगु हे नगर दुने सतिक उपचार याकेखंगुलिं लय्ताःगु खँ कनादीगु खः ।

कीर्तिपुर अस्पतालं किपू नगरपालिकाया ग्वाहालिं न्यागू बेडय् थ्व सेवा सुरु याःगु खः । न्यागू बेडया जूसां आःयात निगू बेडं सेवा न्ह्याकूगु दु । थ्व निगू बेडपाखें छवाःया खुइम्हेसिया डाइलासिस यायेफइगु खँ विभाग प्रमुख डा. अर्चन शम्शेर राणां कनादिल । वय्कलं किपू अस्पतालय् दुगु प्रविधि तसकं बांलाःगु जूगु धासें थन आइसियुलय् तकं तप्यंक डाइलासिस यायेगु सुविधा दुगु खँ धयादिल ।

अस्पतालय् डाइलासिसया मेशिन, बेड हयेगु निंतिं किपू नगरपालिकां १ करोड १० लाख तका दां बिउगु खः । आः डाइलासिस याइपिंत निःशुल्क सेवा बीगु निंतिं नं किपू नगरपालिकां छम्हेसिया १५०० तक व्यहोरे याइगु व द्वःछि तका कीर्तिपुर अस्पतालपाखें व्यहोरे याइगु खँ मेयर महर्जनं धयादीगु दु ।

सरकारं निःशुल्क सेवाया निंतिं २५०० तका बिया वयाच्वंगु खःसा आःत थनया डाइलासिस सेवा स्वास्थ्य विभागय् सूचिकृत मजूनिगुलिं थन डाइलासिस यायेबलय् ध्यबा मवइगु जूगुलिं आःयात निःशुल्क हे उपचार यायेत नगरपालिका व अस्पताल जानाः व्यहोरे यायेत्यंगु खः । थनया सेवा नं सुचिकृत जुइवं न्यागुलिं बेडपाखें डाइलासिस सेवा सुचारु जुइगु खँ नं धाःगु दु ।

ज्याझ्वलय् न्ववासें कीर्तिपुर अस्पताल संचालन याना वयाच्वंगु फेक्ट नेपालया अध्यक्ष गौरी प्रधानं अस्पतालय् थप सेवा बुलुहुं तनावनेगु खँ धयादिल ।

सम्बन्धित बुखँ

LEAVE YOUR COMMENTS