यल लाय्कुलिइ सिलु फेस्टिभल

नेवाः बौद्ध धर्मावलम्बितय् तःजिगु गुंला पर्व व थ्व हे गुंलाया इलय् मेला जुइगु छगू धार्मिक पर्यटकीय स्थल सिलु खः । नेपाल संवत्कथं झिगूगु ला गुंला व सिलु तीर्थ नाप स्वाकाः प्रोजेक्ट बाजा नेपालं छगू सांगीतिक ज्याझ्वःया ग्वसाः ग्वल । उगु संस्थां ‘सिलु फेस्टिभल इन दरवार’या नामं उगु सांगीतिक ज्याझ्वःया ग्वसाः ग्वःगु खः ।

गुंला पर्वया इलय् लाकाः जूगु ज्याझ्वलय् थीथी परम्परागत सांगीतिक बाजंया प्रस्तुति ज्याझ्वलय् दुगु खः । ज्याझ्वःया शुरु धाःसा बौद्ध लिला प्याखंपाखें जुल । यल लाय्कूस्थित नासः चुकय् जूगु ज्याझ्वलय् न्ह्यब्वःगु बौद्ध लिला प्याखं विश्वय् ३८० दँ न्ह्यःनिसें निरन्तर रुपं थौंतक नं क्यना वयाच्वंगु नाट्य परम्परा धकाः तकं दावी याना वयाच्वंगु कात्ति प्याखनय् क्यनीगू छगू दुर्लभ प्याखं खः ।

गुगुं इलय् दँय्दसं कात्तिक महिनाय् लछियंकं क्यनीगु थ्व कात्ति प्याखं थीथी परिस्थितिया कारणं छवाःजक क्यनेगुलिइ तकं सीमित जूगु खःसा थौंया इलय् तक थ्यंगु अवस्थाय् आः झिंनिन्हुतक क्यनेगु याना हयाच्वंगु दु । नेपाल संवत्या तिथिकथं चतुर्दशी वा पुन्हि निन्हु लात धाःसा जक थ्व प्याखं कात्ति प्याखनय् क्यनेगु याना वयाच्वंगु दु ।

कात्ति प्याखं संरक्षण समितिया प्रतापधर शर्मा व सुरेन्द्र वज्राचार्यया खिं बाजनय् उत्तमरत्न शाक्य, सुप्रिन शाक्य, पूजन श्रेष्ठ, रिजन महर्जन, कोशिश ताम्राकारं सिलु फेस्टिभल इन दरवार नांया उगु सांगीतिक ज्याझ्वलय् प्रस्तुति बियादीगु खःसा लुभुस्थित महालक्ष्मी धाः दाफा खलःया विपु श्रेष्ठ, युजेश श्रेष्ठ, सुनिल श्रेष्ठ, प्रशन्न श्रेष्ठ, अभिषेक श्रेष्ठ, सनिष श्रेष्ठ व रोजेश श्रेष्ठं गायनय् साथ बियादीगु खः ।

सांगीतिक परम्पराया खोजी अले त्वाः त्वालय् जक सीमित जुयाच्वंगु थज्याःगु परम्परायात थुकथं जुइगु थीथी कथंया सांगीतिक व मेमेगु दबुलिइ नं न्ह्यब्वयेगु ल्याखं थुगु दँय् प्रोजेक्ट बाजा नेपालं थुगुसी च्वबु गाःहिति हरिभजन दाफा खलःयात नं ब्वनाः ज्याझ्वः याःगु खः । १४ दँ दुपिं नच्चा ल्याय्म्ह निसें कयाः ९५ तक दुपिं ज्याथपिं तकया म्येँ हालामि, वाद्यवादक दुथ्याःगु उगु दाफा खलकं ललित, नेपाल समुद व सब माई दाफा भजनया प्रस्तुति बिउगु खः ।

दिनेश महर्जनया नेतृत्वय् आजु कान्छा महर्जन, म्येँ गुरु सानुकाजी महर्जन, दाफा गुरु बेखालाल महर्जन, नामसंगीति गुरु बाबुकाजी महर्जनलिसें सहायक गुरुपिं दशरथलाल महर्जन, गौतम महर्जन, नारायण महर्जन, बाबुराजा महर्जन, त्रिरत्न महर्जन, सानु महर्जन, रत्न महर्जन, विजय महर्जन, मधुर महर्जन, चन्द्रलाल महर्जन लगायतं दाफा म्येँ न्ह्यब्वयादीगु खःसा वय्कःपिंत अबिज महर्जन, एन्जेल मजर्हन, आभाष महर्जन लगायतया पुचलं वाद्यवादनय् ग्वाहालि यानादीगु खः ।

प्रोजेक्ट बाजा नेपालं गुरु सुरेशराज वज्राचार्यया वाद्य संयोजनय् भगवान बुद्धया वर्णन यानातःगु व प्रत्येक बौद्ध देगः, चैत्यय् थाइगु व हालीगु म्येँ भगवान ग्वाहारया प्रस्तुति बियादीगु खः । चाल पञ्चम अर्थात न्यागू ताल च्वः, पलेमां, अस्तरा, जति व प्रतालय् थाइगु भगवान ग्वाहार राग सारंगय् आधारित खः ।

सरोदवादनय् सुरेशराज वज्राचार्य व फिरोज वज्राचार्य, भ्वाइलिनय् मिलन तण्डुकार, तालवादनय् लक्ष्मीप्रसाद डंगोल, विपु श्रेष्ठ, ताः, भुस्याः, छुस्याः व इफेक्टय् सजिष श्रेष्ठ, रोजेश श्रेष्ठ बेस गितारय् भूपेन्द्र वज्राचार्य, गितारय् सुमन महर्जन, बासुरिइ स्वर्णिम महर्जनं बियादीगु भगवान ग्वाराया प्रस्तुति लिपा ज्ञानमाला भजनय् अतिकं लोकंह्वाःगु म्येँ ‘जय नमो श्री बुद्ध भगवान, लुम्बिनी वनस ……..’या प्रस्तुति बिउगु खः ।

प्रोजेक्ट बाजा नेपालं नेवाः सांगीतिक परम्पराय् अतिकं लोकं ह्वाःगु ऋतु म्येँ अन्तर्गत सिलुया धुन न्ह्यब्वःगु खः । गुंलाया दथुइ गुंपुन्हिया दिनय् सिलुइ तःधंगु मेला जुइ । सिलु तीर्थया हे बयान यानातःगु थ्व म्येँय् कलाःभाःत निम्ह तिपूया सिल यात्राया वर्णन यानातःगु अतिकं मार्मिक बाखं दुथ्याःगु म्येँ खः ।

थुकथं हे ज्याझ्वलय् गुंलाया हे इलय् यलय् दँय्दसं तःजिक न्यायेकीगु मतयाः अर्थात श्रृंगभेरी जात्राया इलय् हालीगु परम्परागत म्येँया धुनयात नं न्ह्यब्वःगु खः । मतयाःया इलय् हालीगु म्येँया सांगीतिक धुन न्ह्यब्वःगु इलय् ज्याझ्वः स्वयेत वयाच्वंपिं सकलें प्याखं हुला हःगु खः । ज्याझ्वलय् मेगु प्रस्तुति कथं राजिप वज्राचार्यं शान्त भैरवया प्रतीक लाखे प्याखंया प्रस्तुति बियादीगु खः ।

विशेष यानाः येँयाः पुन्हिया इलय् पिहां वइगु मजिपाः लाखे प्याखनं समाजया नकारात्मक शक्तियात शिथिल याइ धइगु विश्वास यानातःगु दु । नेपाःया तना वनेधुंकूगु व लोपोन्मुख बाजंया संरक्षण, संवद्र्धन व प्रवद्र्धन यायेगु उद्देश्यं प्रोजेक्ट बाजा नेपालं वंगु छुं दँ न्ह्यवंनिसें थुकथंया ज्याझ्वः याना वयाच्वंगु दु ।

थुगुसी जूगु ज्याझ्वलय यल महानगरपालिकाया प्रमुख चिरिबाबु महर्जन मूपाहांकथं झायादीगु खःसा ज्याझ्वलय् यल मनपा २१ वडाअध्यक्ष रविन्द्र महर्जन, नेपाली कांग्रेस यल जिल्ला समितिया सभापति राजेश महर्जन, सशस्त्र प्रहरी बल नेपाल वाद्यवादन गुल्म प्रमुख नापं वरिष्ठ सशस्त्र प्रहरी नायब निरीक्षक तीर्थ ढुंगेल, पाटन संग्रहालयया सुरेश लाखे, कात्ति प्याखं संरक्षण समितिया किरण चित्रकार वरिष्ठ शास्त्रीय संगीतज्ञ प्रभुराज ढकाल लगायतया उपस्थिति दुगु खः ।

# न्ह्यब्वःम्ह सुरजवीर वज्राचार्य