प्रधानमन्त्रीयात नेवाःतय्सं न्ह्यसः पौ बीगु

येँ-झी नेवाःतय्सं प्रधानमन्त्रीयात मधासे मगाःगु विषययात कयाः छगू सहलह मुँज्या जुल । सहलह मुँज्याय् नेवाःतय्पाखें सरकारयात ध्यानाकर्षण यायेमाःगु थीथी पक्षयात कयाः थःथःगु नुगःखँ नापं सुझाव बियादीगु खः ।

नेवाः देय् दबूया संयोजनय् वंगु शनिवाः नेवाः भूमि, संस्कृति व सम्पदा संरक्षण विषययात कयाः उगु सहलह मुँज्या जूगु खःसा ज्याझ्वः देय् दबूया नायः नरेश ताम्राकारया सभापतित्वय् जूगु खः ।

ज्याझ्वलय् स्वनिगःन्यंकं नेवाःतय्त विस्थापित यायेगु ल्याखं विकासया नां बियाः हयाच्वंगु थीथी योजना विरुद्ध संघर्ष याना वयाच्वनादीपिं अभियन्तापिं पंचलाल महर्जन, सुमन साय्मि, नेपाल डंगोल, राजेन्द्र महर्जन, लोककवि राजभाई जकःमि, आशामान संगत, आदिवासी जनजाति वकिलतय् समूह लाहुर्निपया महासचिव शंकर लिम्बु लगायतं नुगःखँ तयादीगु खः ।

नेवाः स्वायत्त राज्य मंकाः संघर्ष समितिइ दुथ्याःगु थीथी घटक संस्था, नेवाः जातीय खलः पुचः व नेवाः आन्दोलन÷अभियानय् लगे जुयाच्वंगु संस्थां समन्वय याःगु सहलह मुँज्याय् नवानदीपिं वक्तातय्सं नेवाः सरोकारया थीथी विषयवस्तुइ केन्द्रीत जुयाः नुगःखँ तयादीगु खः ।
उगु सहलहमुँज्यापाखें प्राप्त सुझावयात स्वनिगःया स्वंगुलिं जिल्लाया प्रमुख जिल्ला अधिकारीमार्फत प्रधानमन्त्रीयात ज्ञापन पौ लःल्हाइगु जूगु दु । थ्व हे वइगु फागुन ३ गते प्रधानमन्त्रीयात लःल्हायेत्यंगु उगु ज्ञापन पौ मुँज्याय् श्रीकृष्ण महर्जनं ब्वनाः न्यंकादीगु खः ।

सम्बन्धित बुखँ

LEAVE YOUR COMMENTS