नेपालभाषा संकिपा ख्यलय् व्यावसायिकता खनेमदुनि
थ्यंमथ्यं निदँ लिपा हालय् जक रिलिज जूगु ‘कसलाइ दिउँ म…..’ धाःगु नेपाली म्युजिक भिडियोपाखें कलाकारिता ख्यलय् पुनरागमन यानादीम्ह कलाकार खः– सलोना वज्राचार्य ।
थनिं झिदँ न्ह्यः बुटवलय् जूगु ¥याम्प शोलय् ब्वति कयाः मोडलिंगपाखें रंगीन संसारय् दुहां वःम्ह सलोनां अनंलिपा थीथी विज्ञापन, नेपालभाषा व नेपाली भाय्या म्युजिक भिडियो नापनापं टेलिप्याखं म्हितेधुंकूगु दु । छम्ह कलाकारयात थम्हं यानागु अभिनय दक्वं बांलाइ । तर वय्कःयात थः तसकं सन्तुष्ट जूगु धाःसा नेपालमण्डल टिभिइ वइगु टेलिप्याखं ‘ताःचा प्वाँय्’ खः । नेपाली म्युजिक भिडियोय् शितल मोक्तानया ‘म फुल हुँ …..’ पाखें पलाः न्ह्याकूम्ह सलोनाया नेपालभाषाया न्हापांगु म्युजिक भिडियो ‘नानिचिया फेशन……’ म्येँया बोल खः ।
मां तेजशोभा वज्राचार्य व अबु मदुम्ह सानुभाई वज्राचार्य याकः म्ह्याय् सलोना मचांनिसे कलाकारिता धालकि हुरुक्क जुइम्ह खः । कलाकारिता क्षेत्रय् हे दुहां वये धकाः वःम्ह खःसां सलोनायात नेपालभाषा ख्यलय् धाःसा दुहां वयेगु बिचाः मदुगु जुयाच्वन । लिपा म्युजिक भिडियो म्हिते धुंकाः नेपालभाषाय् नं लिपा थ्यंकं पलाः न्ह्याकावनेगु बिचाः यानादिल ।
थौंकन्हय् लजगाःकथं प्राइम कलेजय् ‘एक्ज्युकेटिभ हेड’ जुयाः ज्या याना वयाच्वंम्ह सलोनां खस् नेपाली भाय्या ‘सेल्फी किंग’ नांया छगू प्याखनय् नं लगानी यानादीगु दु । खस् नेपाली व नेपालभाषाया ख्यलय् छु अन्तर दु धइगु न्ह्यसलय् सलोनाया लिसः दु ‘अन्तर स्वयां नं तुलना हे यायेमछिं, छाय्कि थ्व निगू ख्यलय् आकास जमीन हे पाः । छाय्धाःसा खस नेपाली भाय्या फिल्मख्यः छगू थासय् तक विकास जुइधुंकूगु दु । नेपाली भाय् फिल्म उद्योगय् प्रोफेशनालिज्म वयेधुंकल तर नेपालभाषा ख्यलय् प्रोफेशनालिज्म वःगु जिं आतक नं मखंनि । फयांफछि थःथः हे यायेगु । बजेट कम जूगु हिसाबं ‘फ्रि’ नं याकेगु चलन अझनं नेपालभाषा ख्यलय् जिं खनाच्वना । तर खस नेपाली भाषाय् छन्हुया वा घौछिया जक जूसां ल्हाः खाली मजुइमा धकाः पारिश्रमिक बीगु चलन विकास जुइधुंकूगु दु, नेपालभाषा ख्यलय् धाःसा जिं अझ नं खं हे मखंनि ।’
यदि खस नेपाली भाय्या ख्यलय् थें संस्कार हयेगु खःसा छु यायेमाली धइगु जिज्ञासाय् सलोनां धयादी – ‘दकलय् न्हापां छगू बिचाः निं हिलेमाः । सिनियर कलाकारं ‘फ्रि’ नं याना मबिउसा मेम्ह दु हे दुनि धइगु बिचाः हिलेमाः । अले मेगु खँ कलाकार स्वयम थम्हं नं जि कलाकार जुइगु निंतिं फ्रि नं याये माःसां यानाबी धइगु बिचाः नं हिले फयेकेमाः ।’
नेपालभाषा म्यूजिक भिडियोय् अप्वः थें मिसाम्ह कलाकार न्हूपिं हे जक जुइ तर मिजंम्ह कलाकार धाःसा दक्वं ला मखु आपाः थें बाज्य वनेधुंकूपिं हे जक खनेदु । थ्व सन्दर्भय् सलोनाया धापू दुु– ‘खास ला दकलय् न्हापां नेपालभाषा कलाकारिता ख्यलय् मिसापिं कलाकार स्वयां मिजं कलाकार म्हो हे जक दु, उकिसनं सु गायक खः व हे मोडल जुइगु इच्छा यानाच्वनी, अझ गुलि गुलिं गायक थः स्वयमं हे लगानिकर्ता नं जुइगु जूगुलिं सायद अथे जूगु खः ला ।’
थ्व क्षेत्रय् वये मंदुपिं न्हूपिं कलाकारपिंत सलोनाया सुझाव दु– ‘प्रतिभा ला थःके दः हे दइ । उकिया नापनापं छगू क्लास कयाः अनुभव नं कायेगुः व अनंलिपा सैद्धान्तिक व व्यवहारिक ज्ञान कयाः वःसा बांलाइ । यदि थथे जुल धाःसा थःके आत्मविश्वास नं दइगु व थुकिं यानाः जिं याये फु धइगु भावना ब्वलना वइ । थथे जुल धाःसा हे जक शायद सुनां नं फ्रि नं याके फइमखु जुइ ।’
खस् नेपाली क्षेत्रय् लगानी याःम्ह सलोनां नेपालभाषा ख्यलय् लगानीया सोच मयाःगुया कारण लगानी दुबय् जुइगुलिं खःला धइगु न्ह्यसलय् थथे धयादी – ‘आतक ला अज्याःगु छुं विचाः यानागु मदुनि । कारण छु ले धायेबलय् नेपालभाषा संकिपा हलय् क्यनेफुगु मदुनि मात्र च्यारिटी शो जक यायेगु जुयाच्वंगु दु । व नं छगू निगू च्यारिटी शो । दुबय् जुइ धायेगु स्वयां नं लगानीया प्रतिफल छु दु धइगु खँ जक खः ।
थःनापनापं थ्व ख्यलय् वःपिं आपाः धइथें कलाकारपिनिगु इहिपा जुइधुंकल ।
सलोनां नं याकनं हे लसताया खँ न्यंकेगु छुं ग्वसाः जुयाच्वंगु दु धइगु जिज्ञासाय् सलोना खँ थथे दु –‘छेँजःपाखें यक्व हे दबाव वयाच्वंगु दु । थः आपालं पासापिनि ब्याहा जूसां जिं थम्हं थ्व हे उमेर ब्याहा याये वा ब्याहा याये हथाय् जुल धइगु खँय् अज्याःगु छुं विचाः यानागु मदुनि ।’ अथे खःसा आकिवं ला लसताया खँ न्यने दइ जुइनि धइगु कौतुहलताय् वय्कलं धयादी, ‘थ्याक्क हे ला धाये मफु तर सम्भव धाःसा दु ।’ लकडाउनया ईयात सदुपयोगकथं सलोनां युट्युबय् ‘खाने कुरा’ धइगु च्यानल चायेकाः नेवाः नसा दयेकेगु व नेवाः नसाया जानकारी नं बिया वयाच्वंगु दु ।
LEAVE YOUR COMMENTS