नाचघरया दबुलिइ वामिया दबू

येँ – गोदावरी साहित्य परिषद्या ग्वसालय् वंगु शनिवाः थनया राष्ट्रिय नाचघर जमलय् वरिष्ठ संगीतकःमि जगमोहन वामिया सम्मानय् ‘जगमोहन वामि एकल संगीत साँझ वामिया दबू ज्याझ्वः जुल । ज्याझ्वलय् मुक्कं जगमोहन वामिया हे जक म्येँ न्ह्यब्वःगु खः ।

नेपालभाषा ख्यलय् नांजाःम्ह संगीतकार जुगल डंगोलया संगीत संयोजनय् थीथी वाद्यवादकपिंसं साथ बिउगु ज्याझ्वलय् वादेय्या हे संगीतकःमिपिंसं अर्केष्ट्राया नं न्ह्यब्वःगु खः । ज्याझ्वलय् वरिष्ठ संगीतकःमि वामिलिसें ख्यालिजुजु मदनकृष्ण श्रेष्ठ, जुजुकाजी रंजित, संगीता शाक्य, सानुबाबु महर्जन, निशा देसार, प्रताप दास, उत्तम महर्जनपिंसं जगमोहन वामिया म्येँ न्ह्यब्वयादीगु खः ।

अथे हे ज्याझ्वलय् जगमोहन वामिया काय डा. भाष्करमोहन कायस्थ, वय्कःया छय् चैतन्यमोहन कायस्थ व काय्चा कैलाशमोहन कायस्थं नं म्येँ हालादीगु खः । ज्याझ्वलय् न्ह्यब्वःगु दक्व धइथें म्येँ वामिया खःसा वय्कलं थःगु सांगीतिक यात्राया झ्वलय् हालादीगु दक्वं म्येँय् नांजाःम्ह संगीतकार कृष्णमान डंगोलं लय्चिनादीगु खः ।

तर ज्याझ्वलय् वय्कःया किपा तकं मदुगु जक मखु नां तक नं मकाःगु खँय् धाःसा यक्वसिनं अहसज महसुस याःगु खः । परिषद्या नायः वशिष्ठकुमार अधिकारीया सभापतित्वय् जूगु ज्याझ्वःया उलेज्या मूपाहां वाङ्मय शताब्दीपुरुष सत्यमोहन जोशीं यानादीगु खः ।

ज्याझ्वलय् मूपाहां जोशीलिसें गोदावरी नगरपालिकाया प्रमुख गजेन्द्र महर्जन, यल क्षेत्र नं. १या सांसद नवराज सिलवालं थःथःगु नुगःखँ तयादीगु खःसा राजभाई जकःमिं वामियात कयाः च्वयादीगु चिनाखँ वाचन यानाः न्यंकादीगु खः । ज्याझ्वलय् वरिष्ठ म्येँ हालामि प्रेमध्वज प्रधानलिसें आपालं संगीतकःमिपिनिगु उपस्थिति दुगु खः ।