थारूतय्सं हानं संविधान च्याकीगु

येँ – थीथी झिंप्यंगू माग सहित थरुहट थारुवान राष्ट्रिय मोर्चां थःपिनि आन्दोलनया ज्याझ्वः सार्वजनिक याःगु दु । म्हिगः धनगढीइ पहिचान पक्षधरतय् दथुइ अन्तक्र्रिया यासें आन्दोलनया ज्याझ्वःया पित बिउगु खः । अन्तक्र्रियाय् न्ववासें थारु नेता लिसें मोर्चाया संयोजक लक्ष्मण थारूं प्रधानमन्त्री केपी शर्मा ओलीयात राष्ट्रघाती जूगु द्वपं बियादीगु दु ।

वय्कलं धयादिल, ‘प्रधानमन्त्री केपी ओली निरंकुशतावादी, तसकं जातिवादी, राष्ट्रघाती जूगुलिं थ्व पालय्प्रमयात नापमलासें जिपिं आन्दोलनय् कुहां वयागु खः ।’ वय्कलं थ्व स्वयां न्हापा नं थःपिंसं नेपाःया संविधान च्याकागु खः धासें आः हाकनं च्याकेगु नं घोषणा यानादिल ।

वय्कलं कैलालीया टिकापुर घटनाय् जन्मकैदया फैसला जुयाः जेलय् कुनाच्वंम्ह रेशम चौधरी लिसें झिंछम्हेसित रिहा यायेमाःगु माग नं यानादिल । थःत नं पीनिला तक झुठा मुद्दा तयाः कुनातःगु धासें आपालं निर्दोष थारूत अझ नं जेलय् दनिगु जिकिर नं यानादिल । २०७२ साल भदौ ७ गते टिकापुरय् जूगु थारू आन्दोलनय् छम्ह मचा लिसें च्याम्ह प्रहरी सीगु खः । उगु घटनाया छानविन यायेत सरकारं नीस्वंगु गिरिशचन्द्र लाल आयोगं सरकारयात प्रतिवेदन लःल्हायेधुंकूसां सरकारं उगु प्रतिवेदन धाःसा अझं सार्वजनिक याःगु मदुनि ।

थ्वहे झ्वलय् थारू आन्दोलनया समर्थनय् माघ २५ गते येँय् नं छगू अन्तक्र्रिया याइगु जूगु दु । उकी नेपाः राष्ट्रिय पार्टी लगायत थीथी आदिवासी जनजाति पार्टीया नेतातय्सं सम्बोधन याइगु ज्याझ्वः दु ।