मचा चिनाखँ कासाया सिरपाः लःल्हात

येँ – ग्लोबल नेपाल नेटवर्क व नेवाः एचडी टेलिभिजनया मंकाः ग्वसालय् जूगु मचा चिनाखँ धेंधेंबल्लाः कासाय् उत्कृष्ट जूपिंत वंगु छुं दिं न्ह्यः थनया नेपाः ब्यांक्वेटय् जूगु छगू ज्याझ्वःया दथुइ सिरपाः लःल्हात । नेटवकर्टया कजि सुनीलकुमार शाक्यया सभापतित्वय् जूगु ज्याझ्वःया मूपाहां जनकवि दुर्गालाल श्रेष्ठं सिरपाः लःल्हानादीगु खः ।

मूहापां जनकवि श्रेष्ठं त्वाःदेवाय् मत च्याकाः उलेज्या यानादीगु ज्याझ्वलय् जगतसुन्दर ब्वनेकुथिया ब्वँमिपिंसं नेवाः राष्ट्रिय म्येँ न्ह्यब्वःगु खः । नेटवर्कया कजिलिसें नेवाः एकता अभियानया नं कजि जुयाच्वनादीम्ह शाक्यं लसकुस यानादीगु ज्याझ्वलय् मचा चिनाखँ धेंधेंबल्लाः कासाया ल्यज्या पुचःया कजि नांजाःम्ह साहित्यकार भूषणप्रसाद श्रेष्ठं कासाय् उत्कृष्ट जूपिं मस्तय्गु नां घोषणा यानादीगु खः ।

उगु मचा चिनाखँ धेंधेंबल्लाः कासाय् थीथी ब्वनेकुथिया मुक्कं न्हय्निम्ह मस्तय्सं ब्वति काःगु खः । कासाय् ईसिका महर्जन न्हाप, लुमन्ति देसार लिउ, सुभानी राणा चित्रकार लियांलिउ व लुँस्वां मानन्धरं सामाजिक संजालय् दकलय् अप्वः स्वःगु ल्याखं ‘भ्युअर्स च्वाइस’या सिरपाः लःल्हाःगु खः ।

कासाय् न्हापयात नीद्वः, लिउयात झिंन्याद्वः, लियांलिउयात झिद्व व फेसबुक व युट्युबय् दकलय् अप्वः यायेकूगुयात झिद्वः तका दां लःल्हाःगु खः । कासाय् सिरपाः त्याकादीपिंत नेटवर्कया कजि शाक्यं खादां न्ययेकादीगु खःसा मूपाहां जनकवि श्रेष्ठं सिरपाः व दसिपौ लःल्हानादीगु खः ।

ज्याझ्वलय् विशेष पाहाकथं येँ महानगरपालिकाया उपप्रमुख हरिप्रभा खड्गी श्रेष्ठ, नेवाः न्ह्यलुवा मल्ल के. सुन्दर, ल्यज्या पुचःया कजि भूषणप्रसाद श्रेष्ठ, नेवाः एकता अभियानया कुमुद श्रेष्ठ, नेवाः बस्ती नेवाः स्कुल अभियानया कजि दीपक तुलाधर , जगतसुन्दर ब्वनेकुथिया प्रिन्सिपल सुनिता मानन्धर, हलिं नेवाः दबूया श्रीजन प्रधान, नेवाः एचडी टेलिभिजनया प्रमुख नविन जोशी, एकीकृत नेवाः बस्ती अभियानया मचाराजा महर्जनपिं झायादीगु खः ।

सम्बन्धित बुखँ

LEAVE YOUR COMMENTS