ने. सं. ११४४ कौलाथ्व दुतिया -

आक्रमणकारी ज्वनेत रक्षामन्त्रीया निर्देशन

थिमि – रक्षामन्त्री ईश्वर पोखरेलं मध्यपुर थिमि नगरपालिकाया प्रमुख मदनसुन्दर श्रेष्ठयात आक्रमण याःपिं आक्रमणकारीयात ज्वनेत निर्देशन बियादीगु दु । रक्षामन्त्री पोखरेलं नगरप्रमुख श्रेष्ठयात आक्रमण याःपिं आक्रमणकारीयात तत्काल ज्वनेत धासें प्रमुख जिल्ला अधिकारी व प्रहरी परिसरया प्रमुखयात निर्देशन बियादीगु खः ।

आक्रमणकारीतय् आक्रमणय् लानाः घाःपाः जूम्ह नगरप्रमुख श्रेष्ठया स्वास्थ्यस्थिति बारे जानकारी कायेत नगरपालिकापाखें हे संचालन यानाच्वंगु कोरियामैत्री अस्पताल झायादीम्ह वय्कलं जिल्लाया प्रमुख जिल्ला अधिकारी द्रोण पोखरेल व प्रहरी परिसरया प्रमुख प्रहरी उपरीक्षक किरण राणात फोन यानाः उकथंया निर्देशन बियादीगु खः ।

उगु इलय् रक्षामन्त्री पोखरेलं आक्रमण जूगु ईया दृश्य मोबाइल व वय्कःया छेँय् तयातःगु सीसीटीभी क्यामराया ग्वाहालिं आक्रमणकारी म्हसीकेगु अवस्था दयेक दयेकं नं इमित ज्वने मफुगु खँय् चिउताः प्वंकादीगु खः । थ्व हे झ्वलय् प्रहरी सुत्रं आक्रमणकारीत ज्वने फइगु दावी याःगु दु ।

नगरप्रमुख श्रेष्ठया छेँय् तयातःगु सीसी क्यामराया ग्वाहालिं आक्रमणकारी सु खः धइगु पत्ता लगे जुइ धुंकूगु व इमित याकनं ज्वने फइगु दावी याःगु खः । प्रमुख श्रेष्ठयात वंगु शनिवाः वय्कःया हे छेँय् प्यम्हेसिया पुचलय् वःपिं आक्रमणकारीतय्सं याःगु आक्रमणय् लानाः घाःपाः जुयादीगु खः । वय्कःयात रडं प्रहार याःगु खःसा वय्कलं ल्हातं पनादीगुलिं खः ।