ने. सं. ११४४ ञलाथ्व नवमी -

कोरोना संक्रमणं जनगणना प्रभावित

येँ- कोरोनाया निगूगु लहरया संक्रमणं यानाः थुगुसी जुइमाःगु राष्ट्रिय जनगणना अभियान नं प्रभावित जूगु दु । कोरोनाया निगूगु लहरव्यापक रुपं न्यना वनेवं वंगु बैशाख १६ गतेनिसें तयातःगु निषेधाज्ञा जारी हे दु । प्रत्येक झिदँय् छक्वः जुइगु राष्ट्रिय जनगणना अभियान सामान्य अवस्था जूगु खःसा थ्व इलय् जनगणना काइपिं गणकत छेँय् छेँय् वयेधुंकीगु खः । पूर्वनिर्धारित ज्याझ्वः कथं वंगु जेठ २५ गतेनिसें जनगणना अभियान न्ह्याकाः असार ८ गतेया दुने क्वचायेकेमाःगु खः ।

तर कोरोना महामारीया कारणं थुगुसी थ्व राष्ट्रिय अभियान प्रभावित जूगु दु । थुकथं क्वःछिनातःगु इलय् राष्ट्रिय जनगणना अभियान न्ह्याके मफुगु इतिहासय् थ्व न्हापांखुसी जूगु खँ केन्द्रीय तथ्यांक विभागं धाःगु दु । विभागया सूचना अधिकारी तीर्थराज चौलागाइँया कथं राष्ट्रिय जनगणना अभियान क्वःछिनातःगु तिथिइ न्ह्याये मफुगु थ्व न्हापांगु घटना खः ।

वय्कःयाकथं कोरोना महामारीया कारणं नेपालय् जक मखुसें विश्वया न्यागू दर्जन स्वयां अप्वः देशय् जनगणना कायेगु ज्या प्रभावित जूगु दु । यदि स्थिति सामान्य जुया वन धाःसा वइगु साउनया मध्यनिसें असोज मध्यतकया दुने जनगणना कायेगुकथंया तयारी जुयाच्वंगु जानकारी विभागं बिउगु दु ।

कोरोना संक्रमणया कारणं चालु आर्थिक दँय् जनगणना कायेगु ज्या न्ह्याके मफइगु जुइवं आः मेगु आर्थिक दँय् बजेट व्यवस्थापन यानाः जनगणना कायेगु कथंया तयारी जुयाच्वंगु विभागं स्पष्ट याःगु दु । जनगणनाया निंतिं सुपरी– वेक्षक व गणकयात ‘रिफ्रेसमेन्ट’ तालिम बीमाःगु जूगुलिं नं ई काइगु खँ विभागं न्ह्यथंगु दु ।

देय् न्हूगु संरचनाय् वनेधुंकाः न्हापांखुसी कायेत्यंगु जनगणनाया निंतिं न्हय्गू प्रदेश व न्हय्न्हय्गुलिं जिल्लाय् ज्याकू तकं चायेकाः च्याद्वःम्ह सुरपरीवेक्षक व स्वीगुद्वलं मल्याक गणक छनोट यानाः जिल्ला व स्थानीय तहलय् जुइगु तालिम तकं बिया तयेधुंकूगु दुु । नेपालय् वि.सं. १९६८ निसें प्रत्येक झिदँय् छक्वः जनगणना कया वयाच्वंगु दुसा थुगुसी झिंनिक्वःखुसी जनगणना कायेत्यंगु खः।