ने. सं. ११४४ कौलाथ्व तृतीया -

‘पद्मरत्नं हःगु हिउपाःयात हाथ्या बियाच्वंगु दु’

येँ – नेवाः न्ह्यलुवा लिसें वरिष्ठ मानव अधिकारवादी नेता पद्मरत्न तुलाधरया न्याक्वःगु लुमंनि न्यायेकल । शनिवाः थनया शंखधर उद्यान (पुलांगु रत्नपार्क) य् च्वंगु भाजु तुलाधरया झ्वाता न्ह्यःने छगू ज्याझ्वः यासें लुमंति न्हि हंगु खः । ज्याझ्वः पद्मरत्न तुलाधर राष्ट्रिय स्मृति प्रतिष्ठान व पद्मरत्न लुमंति गुथिया मंकाः ग्वसालय् जूगु खः ।

ज्याझ्वलय् मूपाहां कथं प्रधानमन्त्री पुष्पकमल दाहाल झाःगु खः । ज्याझ्वःयात सम्बोधन यासें वय्कलं थःपिंसं न्ह्याकागु जनविद्रोहयात शुरुया इलय् थूपिं तसकं म्हो जक मनूत दुगु खः, थ्व म्हो जक मनू मध्ये पद्मरत्न तुलाधर नं छम्ह खः धयादिल । तुलाधरं नेपालय् गणतन्त्र, लोकतन्त्र स्थापना यायेत तःधंगु योगदान बियादीगु खँ लुंमकुसें प्रम दाहालं थौं वयाः हानं नं पद्मरत्नया योगदानं प्राप्त जूगु उपलब्धीयात हाथ्या बीगु ज्या जुयाच्वंगुलिं उकी झी सचेत व सतर्क जुइमाःगु दु धयादिल ।

अथे हे वय्कलं नकतिनि नीस्वंगु पद्मरत्न तुलाधर राष्ट्रिय स्मृति प्रतिष्ठानयात जग्गा वा भवन उपलब्ध यानाः सरकारपाखें आवश्यक ग्वाहालि यायेगु बचं नं बियादिल ।
नेवाः न्ह्यलुवा राजेन्द्र श्रेष्ठं २०४६ सालय् पद्मरत्न तुलाधरं समन्वयकारी भूमिका मम्हितूगु खःसा नेपाःया राजनीति थौंया अवस्थाय् मथ्यनीगु जुइ धयादिल । पद्मरत्नं लिपा ०४६ साल व ०६३ सालया आन्दोलनयात छथासं हयेगु भूमिका नं म्हितादीगु खँ कनादिल । थौंकन्हय् थीथी नेतातय् नामय् नीस्वनातःगु प्रतिष्ठानत राजनीतिक पार्टीतय्सं कब्जा यानाः अन थःगु पार्टी कार्यालय हे चायेकेगु अवैध ज्या जुयाच्वंगु खँ न्ह्यथँसें वय्कलं पद्मरत्न प्रतिष्ठान अथे छुं नं पार्टीया कब्जाय् मवँसे स्वतन्त्र ढंगं ज्या याइगु संस्था जुइमा धयादिल ।

ज्याझ्वःया सभापतित्व यानादीम्ह प्रतिष्ठानया नायः दमननाथ ढुंगानां पद्मरत्न तुलाधर परिवर्तनया महानायक खः धयादिल । वय्कलं धयादिल, ‘तर पद्मरत्न समेतया योगदानं थौं देशय् गुगु परिवर्तन वल उकियात थौंया पार्टीतय्सं ‘डेलिभरी’ हे याये मफुत । जनताया जीवनय् छुं हे परिवर्तन मवल । उकिं जनतां उकिया विरोध यानाच्वंगु दु ।

पार्टीतय्सं डेलिभरी याये मफुगु खँय् जनतां विरोध याःगुयात गणतन्त्रया विरोध याःगु धकाः देशय् विभाजनया अवस्था हये दइ मखु । गणतन्त्रया विरोध यायेगु अधिकार संविधानय् हे बियातःगु दु । पार्टी व नेतातय्सं बांलाक ज्या यात धाःसा थ्व विरोध अथें मदया वनी ।’

जनजाति न्ह्यलुवा परशुराम तामाङं पद्मरत्न तुलाधरं नेपालय् जनजाति आन्दोलनया सुत्रपात याःगु खँ न्ह्यथँसें वय्कःया नामय् सरकारपाखें छगू राष्ट्रियस्तरया सिरपाः नीस्वनाः वय्कःयात सम्मान यायेमाःगु खँ कनादिल ।

पद्मरत्न लुमंति गुथिया नायः डा. केशवमान शाक्यं पद्मरत्न तुलाधरं बियादीगु योगदानं चूलाःवःगु उपलब्धी थौं छु अवस्थाय् थ्यनाच्वन धकाः निगरानी तयेगु व उकियात पूवंकेत आवश्यक दबाव सिर्जना यायेगु ज्या गुथि व प्रतिष्ठानं याना वनीगु खँ कनादिल ।

प्रतिष्ठानया कोषाध्यक्ष लिसें तुलाधरया म्ह्याय् मय्जु सुम्निमा तुलाधरं पद्मरत्नं नेपाःया फुक्क धइथें आन्दोलनय् योगदान बियादीगु दु तर उकिया उपलब्धी धाःसा जनतां काये खनाच्वंगु मदु धासें कमसेकम संविधानय् च्वयातःगु अधिकार जक जूसां जनतायात चूलाका बीत आह्वान यानादिल ।

नरेशवीर शाक्यं न्ह्याकादीगु उगु ज्याझ्वलय् जनकवि दुर्गालाल श्रेष्ठं तुलाधरया बारे च्वयातःगु नेपालभाषाया कविता पाठ यानादीगु खः ।