नाराबाजी दथुइ बजेट पारित
येँ -विपक्षी नेकपा एमालेया नाराबाजीया दथुइ प्रतिनिधिसभां बजेट पारित याःगु दु । अर्थमन्त्री जनार्दन शर्मां वंगु भदौ २५ गते चालू आर्थिक दँया नितिं १६ खर्ब ३२ अर्ब ८३ करोडया बजेट संसदय् पेस याःगु खः । थ्व बजेट पारित जुइवं आः सरकारयात खर्च यायेगु लँपु नं चाःगु दु ।
एमाले सरकारया पालय् अर्थमन्त्री बिष्णु पौडेलं हःगु विधेयकया म्याद वंगु बुधवाः क्वचायेवं सरकारयात खर्च यायेत तकं समस्या जूगु खः । आः बजेट पारित जूगुलिं खर्च यायेगु लँपु चाःगु दु ।
अर्थमन्त्रीं बजेट प्रस्ताव यायेवं सभामुख सापकोटां बहुमतं बजेट पारित जूगु जानकारी सदनयात याकूगु खः । अध्यादेश बजेट २०७८ यात प्रतिस्थापन यायेगु विधेयक न्ह्यब्वसें अर्थमन्त्री शर्मां कोरोनापाखें प्रभावितपिनि जीवन रक्षा व शिथिल अर्थतन्त्र पुनरुत्थानया नितिं बजेट अभाव मजुइगु खँ धयादीगु दु ।
अर्थमन्त्री शर्मां बजेट ताः ई तक पना तयेवं राज्यया फुक्कं ज्या प्रभावित जुइ फइगु जूगुलिं प्रतिपक्षीया विरोध वावजूद नं बजेट पारित यायेमाःगु खँ धयादीगु दु । विधेयक पारित जुइधुंकाः पत्रकारतलिसे खँ ल्हासें वय्वय्कलं धयादिल, ‘प्रतिपक्षी लिसे वार्ता व संवादयात निरन्तरता बियाच्वनागु दु, ताः ई बजेट पना तल धाःसा फुक्क खँ ठप्प जुइगु जूगुलिं नापं यंकेमाःगु बाध्यता खः ।’
वय्कलं एमाले नापं प्रधानमन्त्री व मेपिं नेतातय्सं निरन्तर संवाद यानाच्वंगु जानकारी नं बियादीगु दु । वय्कलं थम्हं पुलांम्ह अर्थमन्त्री विष्णु पौडेलं हःगु बजेटया छुं नं योजना क्वपालागु मदु धासें बरु थम्हं राजश्व अप्वयेगु आज्जु तयागु खँ नं धयादीगु दु ।
म्हिगः नाराबाजीया दथुइ अर्थमन्त्री शर्मां आर्थिक विधेयक २०७८ प्रस्तुत यानादीगु खःसा उकियात बहुमतं पारित याःगु खः । आः ७२ घण्टा दुने आर्थिक विधेयक–२०७८ यात कयाः सांसदतय्सं संशोधन प्रस्ताव दर्ता याये फइ । उकिया नितिं थ्वहे वइगु असोज ७ गते दफावार सहलहया नितिं सभामुख सापकोटां ई क्वःछिउगु दु ।
अर्थमन्त्री शर्मां म्हिगः राष्ट्र ऋण उठाउने विधेयक नं न्ह्यब्वयादीगु दुसा उगु विधेयक नं बहुमतं स्वीकृत याःगु दु । उगु विधेयकया सैद्धान्तिक पक्षयात कयाः नेमकिपाया प्रेम सुवालं जक न्ववानादीगु खः ।
LEAVE YOUR COMMENTS