निक्वःगु वज्राचार्य अवार्ड जुइगु

येँ(नेपालभाषा टाइम्स)-वज्राचार्य क्लबया ग्वसालय् थ्व हे वइगु पुस २ गते शनिवाः निक्वःगु वज्राचार्य अवार्ड ज्याझ्वः जुइगु जूगु दु । क्लबया ग्वसालय् उगु ज्याझ्वः थनया कमलादीइ च्वंगु प्रज्ञा भवनय् जुइ ।

क्लबं शिक्षा ख्यलय् केन्द्रं थुगु अवार्ड ज्याझ्वः याना वयाच्वंगु खःसा निगूगु संस्करणय् नं थीथी संकायय् सर्वोत्कृष्ट ल्याः हयाः उत्तीर्ण जुयादीपिंत अवार्ड लःल्हाइगु जूगु दु ।
क्लबं बिउगु जानकारीकथं थुगुसी सछि स्वयां अप्वः सम्मानित जुइगु जूगु दु । ज्याझ्वः कजि शैलेन्द्रमान वज्राचार्ययाकथं ज्याझ्वलय् एसइइनिसें स्नातकोत्तर तगिंतक हरेक संकायय् सर्वोत्कृष्ट ल्याः हयाः उत्तीर्ण जूपिंत थुगु अवार्ड लःल्हाइगु जूगु दु । थुकथं हे विद्यावारिधी (पीएचडी) यानादीपिं नापं नेपालभाषा व बुद्धिष्ट विषय कयाः ब्वंपिं विद्यार्थीयात नं अवार्ड लःल्हायेगु ज्याझ्वः दुगु वय्कलं कनादिल ।

निगूगु संस्करणया अवार्ड ज्याझ्वलय् लाइफ टाइम एचिभमेन्टलिसें बौद्ध ख्यलय् विशिष्ट योगदान बियादीम्ह छम्ह व्यक्तियात नं विशेष सम्मान याइगु जूगु दु । लाइफ टाइम एचिभमेन्ट अवार्ड वज्राचार्य समुदाय दुनेया हे छम्ह विशिष्ट व्यक्तियात व विशेष सम्मान बौद्ध ख्यलय् योगदान बियादीपिं न्ह्याम्ह्ं व्यक्तियात बीगु अवार्ड खः । थ्व ल्याखं थुगुसी भाषा थुवाःलिसें बौद्ध विद्वान फणीन्द्ररत्न वज्राचार्ययात लाइफ टाइम एचिभेन्ट लःल्हाइगु जूगु दुसा थीथी बौद्ध सम्पदा संरक्षण यायेगु नापं बुद्ध शिक्षा प्रचार प्रसारय् बियादीगु योगदानयात कयाः येँ महानगरपालिकाया पुलांम्ह प्रमुख विद्यासुन्दर शाक्ययात विशेष सम्मानकथं वज्राचार्य अवार्ड लःल्हाइगु जूगु दु ।

आःयात शैक्षिक ख्यलय् केन्द्रीय जुयाः बिया वयाच्वंगु थुगु अवार्ड बिया वयाच्वंगु खःसा लिपा वनाः मेमेगु ख्यलय् नं योगदान बियादीपिं वज्राचार्य समुदाययात अवार्ड वितरण यायेगु ग्वसाः दुगु क्लबं जानकारी बिउगु दु । क्लबया नापः सर्जु वज्राचार्यं शैक्षिक ख्यलय् केन्द्रीत जुयाः बिया वयाच्वनागु अवार्डयात लिपा वनाः कासा, ब्यापार, उद्योग आदि ख्यलय् नं बीगु कथंया योजना दुगु जानकारी बियादिल ।

क्लबं दकलय् न्हापां सन् २०१९य् थुगु अवार्ड ज्याझ्वः याःगु खः। निदँय् छक्वः बीगुकथं ग्वसाः ग्वया वयाच्वंगु थुगु अवार्ड कोभिड–१९या कारणं थगुने याये मफयेवं थुगसी यायेत्यनागु नं क्लबं जानकारी बिउगु दु ।

सम्बन्धित बुखँ

LEAVE YOUR COMMENTS