ने. सं. ११४४ कौलाथ्व पारू - नःलास्वनेगु

म्हिगःनिसें खोनाय् म्वः ल्हुइगु व वसः हीगु तकं बन्द !

यल(नेपालभाषा टाइम्स)- थनया सांस्कृतिक लागा खोनाय् म्हिगःनिसें म्वः ल्हुइगु व वसः हीगु तकं बन्द जूगु दु । थुगुसी शुरु जुइगु खोनाया झिंनिदँया जात्राया झ्वलय् आः खोनामितय्सं थीथी नियम पालना याये मालीगु जूगु दुसा उकी म्वः ल्हुइ मजिउगु नापं आः देशय् गं न्यायेकेगु, सुलि पुइगु, ब्याहा कय्तापुजा यायेगु, द्यःयात बलि बीगु, भ्वय् न्यायेकेगु थेंज्याःगु छुं नं ज्या याये मजिउ धइगु नियम दुथ्याः ।

अथे हे आः सुं नं खोनामि देशं पिने बाय् च्वं वने मजिउगु नापं पिनेयापिंत नं देशय् बाय् बी मजिउगु, सिन्दुर तयाः जुइ मजिउगु, फलय् तुति यगाकाः च्वने मजिउगु थेंज्याःगु नियम नं दुथ्याः ।

खोनाया भाषासेवी शरणगोपाल डंगोलं कनादीकथं आः सुयां म्वः ल्हुइमाःसा वा वसः ही माःसा देशं पिने च्वंपिं थःथितिपिंथाय् वनाः यायेमाः ।
म्हिगःनिसें शुरु जूगु थ्व नियम आः वइगु यँयाः पुन्हि तक कायम जुइ । थ्व इलय् द्यःयात बन्द क्वथाय् गुप्तवास तया तइगु खँ धाःगु दु । नापं थ्वहे इलय् द्यःया ख्वाःपाः च्वयेगु, थीथी थासय् वनाः द्यः काः वनेगु ज्या नं जुइ ।

वयां लिपा मोहनिया तृतियानिसें सिकाली द्यःया झिंनिदँया प्याखं शुरु जुइगु । दँय्दसं थ्व प्याखं खोनाय् जक हुइकीगु खःसा आः खोनां पिने यल देय् व येँय् समेत हयाः प्याखं हुइकी । येँय् पचली भैरवया झिंनिदँ जात्रा नापं खोनाया झिंनिदँया जात्रा नं न्ह्याइ ।