बाध्य यानाः मुआब्जा बीगु खतरा

येँ – फास्ट ट्रायक पीडित बुंग व खोनाया जनतां बाध्य जुयाः हे मुआब्जा काये मालीगु अवस्था वयाच्वंगु खँ अनया स्थानीय जनतां धाःगु दु । स्थानीय वासिन्दा इन्द्रमान तुलाधरं ‘नेपालभाषा टाइम्स’ लिसे खँ ल्हासें आर्मी हेडक्वार्टरय् थुकिया बारे न्यनेकने यानाबलय् सेनां याकनं मुआब्जा कायेत दबाब बिउगु खँ कनादिल ।

सेनाया फाँटवालां मुआब्जा अप्वइ मखु बरु लँ दयेकेगु, पार्क दयेकेगु विकास निर्माण यायेमाःसा थःपिंसं ग्वाहालि याये धकाः बचं बिउगु खँ नं वय्कलं कनादिल । सेनाया उगु बचनय् थःपिं विश्वस्त जुइ फइ मखु धासें वय्कलं फास्ट ट्रायक दयेकेगु झ्वलय् अनया छगू स्कुलया ७५ प्रतिशत जग्गा लाःगु व उगु स्कुल बारे छु यायेगु धइगु बारे आः तक निर्णय मयाःगुलिं सेनाया बचंयात थःपिंसं विस्वास याये मफु धयादिल ।

स्कूलया निंतिं २० निसें २५ आना जग्गाय् भौतिक पूर्वाधार दयेका बी धकाः न्हापा बचं बिउगु खःसां आः छुं ज्या मजूगु द्वपं नं वय्कलं बियादिल ।अथेहे मेम्ह स्थानीय वासिन्दा राम खड्गीं सरकारं जबर्जस्ती हे जनताया जग्गा सितिकं कायेत्यंगु द्वपं बियादिल । वय्कःया कथं गुलि नं स्थानीय जनतां मुआब्जा काःगु दु उपिं सुं हे सन्तुष्ट जुयाच्वंगु मदु ।

वय्कलं धयादी, ‘भुखाय् ब्वयाः पालय् च्वनाच्वंगु इलय् मुआब्जाया खँ हल, भुखाचं पीडित जनतां याकनं छेँ दनेगु लोभं हे मुआब्जा कायेत बाध्य जुल ।’स्थानीय जनतालिसे सहलह तकं मयासे मुआब्जाया ध्यबा निर्धारण याःगु जक मखु मुआब्जा काःमवल धाःसा सञ्चित कोषय् तया बी धकाः तकं ख्याःगुलिं छुं मसिउपिं जनतां ग्यानाः हे मुआब्जा काःगु दावी नं वय्कलं यानादिल ।

खोनायात जिरो प्वाइन्ट दयेकेगु नं गलत जुइगु बिचाः प्वंकादिसें वय्कलं गुगु थासय् जिरो प्वाइन्ट तयेगु धकाः धयाच्वंगु खः उगु थाय् जिरो प्वाइन्टया लागिं पाय्छिगु थाय् मखुगु खँ नं वय्कलं कनादिल ।

जिरो प्वाइन्ट दयेकेगु थाय्या प्यखेरं ३०० मिटरया ल्याखं लँ दयेमाःगु खःसा आःया डिजाइन कथं १०० मिटर जक दु, थ्व डिजाइन कथं फास्ट ट्रायक दयेकेगु ज्या जुल धाःसा फास्ट ट्रायक हे फेल नयेफइगु दावी यासें वय्कलं धयादिल, ‘इन्टर चेन्जिङ जिरो प्वाइन्ट स्वयां ५ किलोमिटर तापायेमाःगु खःसा तर आः १ मिटर इन्टरचेन्जं ज्या यायेगु खःसा थ्व परियोजना फेल नइ ।’

वय्कःया कथं जिरो प्वाइन्ट पिहां वनेत आउटडोर माःगु खः तर आउटडोर मगायेवं यातायात झन जक जाम जुयाः समस्या ब्वलनीगु खनेदु ।