प्राकृतिक विज्ञान संग्रहालययात पर्यटन गन्तव्य दयेकेमाः

येँ – स्वयम्भुइ च्वंगु प्राकृतिक विज्ञान संग्रहालययात नं पर्यटकीय गन्तव्य जुइकथं विकास यायेमाःगु खँ धाःगु दु । शनिवाः संग्रहालय व येँ महानगरपालिका १५ वडाया मंकाः ग्वसालय् जूगु ‘स्वयम्भू पर्यटन विकास व प्रवद्र्धनय् प्राकृतिक विज्ञान संग्रहालयया भूमिका’ विषयय् जूगु गोष्ठीइ न्ववानादिसें संग्रहालयया प्रमुख प्रा. डा. धर्मराज डंगोलं थुगु संग्रहालययात नं पर्यटकीय गन्तव्य दयेके फइ धासें थुकिया निंतिं सरकार महत्व बियाः विकास यायेमाःगु बिचाः तयादिल ।

थ्व झ्वलय् वय्कलं विदेशय् संग्रहालययात गुकथं विकास याना वयाच्वंगु दु धयागु खँ न्ह्यब्वयादीगु खः ।ज्याझ्वलय् न्ववानादिसें मू पाहाँ कथं झायादीम्ह प्रदेश नं ३ या पर्यटन मन्त्री अरुण नेपालं थुगु संग्रहालय दु धयागु तकं थःम्हं मसिउगु खँ धयादिसें स्वनिगलं पिने च्वंपिं अप्वःसिनं थज्याःगु संग्रहालय दुगु धयागु तकं मसिउगु खँ कनादिल ।

वय्कलं संग्रहालययात विकासया निंतिं सहलह यानाः न्ह्याः वनेफइगु खँ तयादिल ।अथेहे ज्याझ्वलय् न्ववानादिसें येँ क्षेत्र नं. ८ या सांसद जीवनराम श्रेष्ठं हनुमानध्वाखा निसें स्वयम्भू तक सम्पदा मार्ग दयेकेगु निंतिं थःपिंसं न्ह्याका च्वनागु अभियानय् थुगु संग्रहालययात नं दुथ्याकाः न्ह्याः वनेफइ धयादिल । वय्कलं पर्यटन विकासया निंतिं थुगु संग्रहालय नं महत्वपूर्ण जूगु धासें थुगु संग्रहालय बांलाकेगु निंतिं थःम्हं फुगु ज्या यायेगु प्रतिबद्धता नं प्वंकादिल ।