
भ्वत(नेपालभाषा टाइम्स)÷थनया नांजाःगु ऐतिहासिक व धार्मिक महत्वया चण्डेश्वरी जात्रा थनिंनिसें शुरु जूगु दु । थनया स्थानीय नेवाः समुदायं विशेष महत्व बियाः हना वयाच्वंगु थ्व जात्रायात चांस पुन्हि (चण्डी पुन्हि) नं धायेगु याः । झण्डै नीन्यासः दँ न्ह्यःनिसें न्ह्यानाच्वंगु जात्राया निंतिं थनया आराध्यदेवीकथं कयातःम्ह चण्डेश्वरी द्यःया देगः झःझः धायेक छाय्पियातःगु दु ।
स्थानीयवासीतय्सं तसकं उत्साहजनक रुपं तःजिक हनीगु जात्राया निंतिं आवश्यक तयारीया ज्याय् जात्रा व्यवस्थापन समिति व स्थानीवासीत लगे जुयाच्वंगु दु ।
जात्राया विधिकथं पुन्हि छन्हु न्ह्यः येँया हनुमानध्वाखां खड्ग हयेमाःगु प्रचलन दु । जात्राया निंतिं खड्गलिसें जात्राया निंतिं सरकारपाखें पुजा याइम्ह व्यक्तिया नं सहभागिता दइ । जात्राया निंतिं धकाः छुं दिं न्ह्यःनिसें हे स्थानीयतय्सं थःथःगु छेँ सुचुकुचु यायेगु तकं याइ । जात्राज्वःछि स्थानीय ज्याथजिथिपिंसं त्वाःत्वालय् भजन यायेगु याइ ।
भ्वतया न्हय्गांयापिंसं नं उतिकं हर्षोल्लासपूर्वक हनीगथु जात्राया न्हापांगु दिं मत पुजा धकाः चिलाख जात्रा याइ । निन्हुया दिं अर्थात स्वांयाःपुन्हिकुन्हु सुथय् तक चण्डेश्वरीयात देगः परिसरय् तयाः वयां लिपा द्यः खःया विधिपूर्वक पुजा यानाः खःयात भ्वतया वाकुत्वालय हइ । द्यः खः प्राचीन लाय्कुलि तक यंकाः अनं हाकनं चण्डेश्वरी द्यःयात चिधंगु मेगु खतय् बिज्याकः वाकुत्वालय् हइ । मूर्तियात चिधंगु खतय् तयाः हाकनं चण्डेश्वरी देगः परिसरय् यंकल कि जात्रा क्वचाइ ।
भ्वतया हे अधिष्टात्री देवी चण्डेश्वरी द्यःया जात्राय् थीथी परम्परागत व सांस्कृतिक बाजंसहित छेँखापतिकं चिलाख ज्वना वयाः थनया लाय्कुलिइ मुनी । अनं जलेश्वर महाद्यःयाथाय् वनाः उकियात विसर्जन याइगु चलन दु ।
चण्डेश्वरी जात्राया झ्वलय् चण्डेश्वरी देगः परिसरय् दुपिं पीगं द्यःयात १२ म्ह दुगु बलि बीगु व उकीमध्ये छम्ह दुगु द्वारे व मेम्ह छम्ह जोशीयात बीगु चलन दु । मेगिु ल्यं दुपिं दुगुया ला कलःदान याइ । कलःदान जात्राय् दुगुया लायात प्रसादया रुपय् जात्रा स्वः वइपिनिगु हुलय् वांछ्वयेगु याइ ।
भ्वतया साय्मि, भोछिभोया, राजवाहक लगायत दक्वं जाति, समुदायया प्रत्यक्ष संलग्नता दइगु जात्रायात स्थानीयतय्सं मोहनि, स्वन्ति थें तःधंगु नखःया रुपय् हनेगु याना वयाच्वंगु दु । जात्रालिसे धार्मिक कथन नं स्वानाच्वंगु दु ।
LEAVE YOUR COMMENTS