गणतन्त्र विरोधी ज्याखँ अप्वःगुलिं नेतात सतर्क
येँ (नेपालभाषा टाइम्स)÷देशय् वःगु राजनीतिक हिउपाःयात हाथ्या बी कथं राजतन्त्रया पक्षय् गणतन्त्र विरोधी ज्याखँत अप्वया वःगु विषयय् तःधंगु दलया नेतातय्सं सहलह ब्याकूगु दु । वंगु छुं ई न्ह्यवंनिसें देय्या थीथी थासय् पुलांम्ह जुजु ज्ञानेन्द्र थः हे लगायत वय्कःया समर्थकतय्सं राजतन्त्र व हिन्दू राष्ट्रया वकालत यासें ज्याखँत न्ह्याका हःगु खः । थ्व ज्याखं यानाः गणतन्त्रवादी नेतात चिन्तित जूगु दु ।
थ्वहे विषयय् चिउताः प्वंकुसें थनिं झिंच्यादँ न्ह्यः जूगु १२ बुँदे शान्ति सम्झौताय् हस्ताक्षर याःपिं प्रमुख दलया शीर्ष नेतातय् दथुइ म्हिगः सहलह ब्याकूगु खः । प्रधानमन्त्री लिसें नेकपा माओवादी केन्द्रया अध्यक्ष पुष्पकमल दाहालया पहलय् जूगु उगु सहलहय् थौंकन्हय् लोकतन्त्र व गणतन्त्रया विरोधय् जुयाच्वंगु प्रहारया विरुद्ध थःपिं नं न्ह्याः वनेमाःगु ई वःगु खः लाकि धकाः चिउताः प्वंकेगु ज्या जूगु खः ।
थौंकन्हय् सामाजिक सञ्जाल व थीथी थासय् परिवर्तनया लागिं सक्रिय जूपिं फुक्क हे पार्टीया नेतातय्त लाक्वपाक्व धायेगु, ब्वः बीगु व व्यवस्था हे हीकेगु थेंज्याःगु खँत अप्वया वःगु बारे नं नेतातय्सं चिउताः प्वंकूगु खः । पिने ब्वलना वःगु थज्याःगु ज्याखँपाखें परिवर्तनकारी राजनीतिक दलया कार्यकर्तात तकं प्रभावित जुयावःगु खँय् चिउताः प्वंकुसें नेतातय्सं थुखेपाखे नं ध्यान बीगु बिचाः तःगु खः ।
ज्याझ्वलय् न्ववाःपिं राजनीतिक दलया नेतातय्सं गणतन्त्र, संघीय व्यवस्था व धर्म निरपेक्षता बारे थःपिनि प्रतिवद्धता प्वंकेगु ज्या याःगु खः । थ्व झ्वलय् नेपाली कांग्रेसया सभापति शेरबहादुर देउवां हिन्दू राष्ट्रया सवालय् थःगु पार्टीइ छुं मनूतय्सं न्ह्यसः थंगु खःसां उकियात कयाः पार्टीं छुं निर्णय धाःसा मयाःगु व तत्कालया लागिं याइ नं मखु धयादिल ।
एमालेया अध्यक्ष केपी ओलीं समाजय् थुकथंया अराजकता ब्वलनाच्वंगु खँय् सरकारया नं दोष दुगु द्वपं बियादिल । सरकारं जनतायात सन्तुष्ट यायेगु छुं ज्या मयाःगु कारणं थज्याःगु अराजकता ब्वलनाच्वंगु खः धासें अध्यक्ष ओलीं गणतन्त्र व संघीय व्यवस्थाप्रति एमाले सदां प्रतिबद्ध दु धयादिल ।
बैठकय् प्रधानमन्त्री दाहाल, देउवा, ओली लिसें पुलांम्ह प्रधानमन्त्री डा. बाबुराम भट्टराई नं झाःगु खः । बैठकय् वय्कःपिंसं व्यवस्था विरुद्ध जुइगु गुगुं नं कथंया प्रहारयात छप्पँ जुयाः प्रतिवाद यायेगु खँय् नं सहमति याःगु खः । परिवर्तनया रक्षा व विकासया खँय् प्रतिबद्धता प्वंकुसें वय्कःपिंसं जनतायात प्रभावकारी सेवा प्रवाह यायेमाःगु खँय् बः नं बिउगु दु ।
प्रधानमन्त्री दाहालं थज्याःगु सहलह शुरुवात जक खः धासें आः थ्व प्रक्रिया निरन्तर न्ह्याइगु जानकारी बियादिल ।
LEAVE YOUR COMMENTS