रिया मानन्धर स्वक्वःखुसी सर्वोत्कृष्ट विद्यार्थी

येँ(नेपालभाषा टाइम्स)- द ब्रिटिस प्रोफेशनल कलेजय् एशोसियसन अफ चार्टर्ड सर्टिफाइड एकाउन्टेन्टस् (एसीसीए) अध्ययन विद्यार्थी रिया मानन्धर हाकनं छक्वः विश्वया सर्वोत्कृष्ट छात्रा जुइत सफल जूगु दु । ब्रिटिस कलेज अन्तर्गत ब्रिटिस प्रोफेसनल कलेज (बीपीसी) अध्ययनरत रिया मानन्धरं हालय् प्रकाशन याःगु लिच्वःकथं विश्वया निम्हम्ह सर्वोत्कृष्ट छात्रा जुइत सफल जूगु खः ।

थगुने मार्च महिनाय् जूगु एसीसीए अन्तर्गत पर्फर्मेन्स म्यानेजमेन्ट परीक्षाय् ९१ प्रतिशत प्राप्त यानाः विश्वया हे सर्वोत्कृष्ट जुइत ताःलाःम्ह रियां सन् २०२१ य् नं ट्याक्सेसन पेपरय् वल्र्ड टप जुयादीगु खः । अबलय् वय्कलं ९८ प्रतिशत प्राप्त यानाः विश्वया सर्वोत्कृष्ट विद्यार्थी जुयादीगु खः । २० दँ दुम्ह रियां थुगुसी नं ‘फाइनालसियल म्यानेजमेन्ट’ य् ९८ प्रतिशत हयाः वल्र्ड टप यानादीगु खः ।

विश्वया १७९ गू देशय् न्यागू लख स्वीन्याद्वः स्वयां अप्वः विद्यार्थी दुगु कलेजं विश्वया द्वलंद्वः विद्यार्थीया निंतिं दयेकूगु प्रश्नपत्रय् दकलय् बांलाःगु लिच्वः रियां प्राप्त याःगु खः । एसीसीए ब्वनेगु निंतिं हे बीपीसीइ भर्ना जुयादीम्ह रियां बीपीसीपाखें विद्यार्थीतय्सं सकतांकथं ग्वाहालि प्राप्त याये फइगु व थम्हं नं परीक्षाया निंतिं यानागु तयारीइ शिक्षकतय्पाखें बांलाःगु हे ग्वाहालि जूगु प्रतिक्रिया बियादीगु दु ।

थः विद्यार्थीं हाकनं छक्वः सर्वोत्कृष्ट लिच्वः हयेत ताःलाःगुलिं कलेजया एसीसीए प्रोग्राम म्यानेजर दीपेन्द्र श्रेष्ठं नं लसता प्वंकादीगु दु । कलेजय् अध्ययनरत रिया स्वक्वःखुसी सर्वोत्कृष्ट लिच्वः हयेत ताःलाःगु खः ।