अल्पकालीन ल्याण्डफिल साइट निर्माण मयाइगु
येँ – येँ महानगरपालिकां स्वनिगःया फोहर व्यवस्थापनया निंतिं दीर्घकालीन ल्याण्डफिल साइट निर्माणयात हे प्राथमिकता बीगु जूगु दु । दीर्घकालीन ल्याण्डफिल साइट निर्माण याइगु जुइवं अल्पकालीन ल्याण्डफिल साइट निर्माण मयाइगु जूगु दु ।
दीर्घकालीन रुपं फोहर व्यवस्थापन यायेत ल्याण्डफिल साइटया ज्या न्ह्यायेधुंकूगुलिं अल्पकालीन ल्याण्डफिल साइट निर्माण मयायेगु येँ मनपां न्ह्यथंगु दु । दीर्घकालीन ल्याण्डफिल साइट तत्काल शुरु यायेगु तयारी जुयाच्वंगुलिं अल्पकालीन फोहर व्यवस्थापन यायेगु थाय् निर्माण मयायेगु मनपां धाःगु दु ।
येँ मनपा वातावरण विभागया प्रमुख हरि श्रेष्ठं दीर्घकालीन फोहर व्यवस्थापनया निंतिं ज्या न्ह्यायेधुंकूगुलिं अनावश्यक रुपं खर्च यानाः अल्पकालीन फोहर व्यवस्थापन साइट निर्माण यानाच्वनेमाःगु आवश्यक मजूगु खँ धयादीगु दु ।
वंगु मंसिर १७ गते च्वंगु मन्त्रिपरिषद्या बैठकं स्वनिगःया फोहर व्यवस्थापनया निंतिं नुवाकोटस्थित बञ्चरे डाँडाया निर्माण यायेमाःगु १५ मिटर तजाःगु ड्यामलिसें मेमेगु पूर्वाधारसहित ल्याण्डफिल साइट निर्माणया निंतिं ज्या न्ह्याकेगु जिम्मा सहरी विकास मन्त्रालयया बीत निर्णय याःगु खः ।
निदँया निंतिं धकाः कयातःगु नुवाकोटय् च्वंगु सिसडोलय् वंगु झिंस्वदँ न्ह्यवंनिसें स्वनिगःया दक्वं स्थानीय तहया फोहर व्यवस्थापन यायेगु ज्या जुया वयाच्वंगु खः । थौंकन्हय् उगु थाय् फोहर जायाः फोहर वांछ्वयेगु थाय् तकं मदयेधुंकूगुलिं उकिया विकल्प मालेगु झ्वलय् बञ्चरेडाँडाय् फोहर व्यवस्थापन यायेत्यंगु खः ।
सिसडोलं बञ्चरेडाँडातक वनेगु लँ दयेकेगु ज्या जुयाच्वंगुलिं तत्कालया निंतिं सिसडोलय् फोहर व्यवस्थापन यायेगु व वयां लिपा न्हूगु थासय् फोहर व्यवस्थापन यायेगु जुइ धासें श्रेष्ठं वइगु निलाया दुने ज्या सिधयेकाः फोहर व्यवस्थापन यायेगु थाय् ज्या शुरु जुइगुलिं छुं ई कायेफुगु खँ धयादिल ।
स्वनिगलं जक न्हिं १२०० मेट्रिक टन स्वयां अप्वः फोहर संकलन जुयाच्वंगु दुसा उकी मध्ये येँ महानगरपालिका लागां जक न्हिं ५०० मेट्रिक टन फोहर संकलन जुयाच्वंगु दु । स्वनिगलं संकलन जुइगु फोहर मध्ये ७५ प्रतिशत स्वयां अप्वः फोहर सिसडोलय् व्यवस्थापन याना वयाच्वंगु खः ।
२०६२ सालय् निदँ जक फोहर व्यवस्थापन यायेगु धकाः थाय् काःगु सिसडोलयात प्यक्वःतक विस्तार यानाः आतक नं फोहर व्यवस्थापन याना वयाच्वंगु दु ।
LEAVE YOUR COMMENTS